ABŞ prezidenti Donald Tramp Avropanın Rusiyaya qarşı tətbiq etdiyi sanksiyaları “kifayət qədər sərt” hesab etmədiyini bildirib. O, bunu Nyu-Cersidə, Bedminster şəhərində jurnalistlərlə söhbəti zamanı deyib.
“Mən sanksiyalar tətbiq etməyə hazıram, amma onlar da öz sanksiyalarını sərtləşdirməlidirlər ki, mənim addımlarıma uyğun olsun”, — deyə o bildirib.
Cənab Tramp vurğulayıb ki, Avropa Rusiyadan neft almağa davam etdiyi müddətdə ABŞ Rusiya əleyhinə sanksiyalar məsələsində tam gücü ilə hərəkət edə bilməz.
Daha əvvəl Donald Tramp bildirmişdi ki, əgər NATO üzvü olan bütün ölkələr birlikdə hərəkət edərək Rusiyadan neft alışını dayandırsalar, o, sərt sanksiyalar tətbiq etməyə hazırdır. Ölkə lideri həmçinin alyans ölkələrinə Çindən idxala 50–100% gömrük rüsumu tətbiq etməyi təklif edib.
