Avropa ölkələri yaxın günlərdə Ukrayna üçün nəzərdə tutulan təhlükəsizlik zəmanətləri planının son detallarını açıqlaya bilər.
Modern.az xəbər verir ki, "The Telegrap"ın məlumatına görə, təkliflər arasında hava məkanının patrul edilməsi və ABŞ-a məxsus özəl hərbi şirkətlərin əməkdaşlarının Ukraynaya göndərilməsi də var.
Avropa müttəfiqləri hesab edir ki, münaqişənin yenidən alovlanmasının qarşısını almaq üçün Ukrayna Silahlı Qüvvələrinin bərpası və onları əsas çıkindirici qüvvəyə çevirmək vacibdir. Plan çərçivəsində Ukrayna ordusu ölkənin quru sərhədlərini qoruyacaq.
Avropa dövlətləri öz üzərinə Ukrayna Silahlı Qüvvələrinin yenidən silahlandırılması və hərbçilərin hazırlanması öhdəliyini götürə bilər. ABŞ isə Ukraynaya özəl hərbi şirkətlərin əməkdaşlarını göndərərək müdafiə istehkamlarının qurulmasına dəstək verməyi planlaşdırır.
Bir sıra Avropa ölkələri demilitarizasiya olunmuş bufer zonanın yaradılmasını və orada sülhməramlıların xidmət aparmasını təklif edir. Ukrayna Avropa hərbçilərinin, Rusiya isə Çin kontingentinin yerləşdirilməsini istəyir.
Məlumata görə, Avropa qoşunları sərhəddən uzaq ərazilərdə “üçüncü müdafiə xətti” kimi yerləşdirilə bilər. Onların Ukraynada 5-10 il qalması nəzərdə tutulur və bu müddət Ukrayna ordusunun öz gücü ilə təhlükəsizliyi təmin edə biləcəyinə əmin olunana qədər davam edə bilər.
Plan, həmçinin Ukrayna üzərində uçuşsuz zona yaradılmasını və kommersiya aviasiyasının bərpasını da əhatə edir. Bundan başqa, Avropa İttifaqı ölkələri Türkiyənin rəhbərliyi altında Qara dənizdə dəniz missiyası həyata keçirmək imkanlarını müzakirə edirlər. Missiyanın əsas məqsədi kommersiya gəmiçiliyini bərpa etməkdir.
