“Sabah”ın hücumçusu Pavol Şafranko Sportinfo.az-a müsahibə verib.
“Tələbələr”in kapitan sarğısını qolunda daşıyan slovakiyalı forvard “Şamaxı” üzərində qazanılan qələbədən sonra (2:1) sualları cavablandırıb.
- “Şamaxı”nı nəhayət ki, səfərdə məğlub etmək əlavə sevinci hissi verir, yoxsa sıradan qələbədir?
- O vaxt komandada deyildim, ancaq futbolçu yoldaşlarımın bildirdiyinə görə təxminən 3 ildir burada qələbə qazana bilmirdik. Xatırlayıram, ötən mövsüm Şamaxıdakı hər iki matçda uduzmuşduq. Bu fakt bizə əlavə motivasiya verirdi. Üstəlik, çempionatdakı ilk oyuna qələbə ilə başlamaq istəyirdik. Təbii ki, sıradan qalibiyyət deyil, önəmi böyükdür.
- Tilsimi qırmaq üçün bu dəfə fərqli nə etdiniz?
- Ən böyük üstünlüyümüz “Şamaxı”nı topa yaxın buraxmamağımız idi. Oyuna nıəzarəti əlimizdə saxlamaqla rəqibin təhlıükə yaratmasına imkan vermirdik. Çünki bu cür meydanda top “Şamaxı”da olanda əks-hücumlar hesabına rəqib qapısına yaxınlaşmağı bacaran kollektivdir.
- Avrokuboklarda keçirdiyiniz 6 oyundan sonra Şamaxıda meydana çıxmaq çətinlik yaratmırdı?
- Belə düşünmürəm. Çünki hər turnirin öz əhəmiyyəti var. Premyer Liqada iddialı olmasaq, avrokuboklara vəsiqə qazana bilmərik. Ona görə də Premyer Liqaya xüsusi diqqət yetirməliyik ki, yayda üzümüz gülsün. Məsələyə peşəkar səviyyədə yanaşanda, uyğunlaşma ilə bağlı problem yaşanmır.
- Sanki cari mövsüm ötən birincilikdən daha gərgin keçəcək. Hiss edirsən?
- Əlbəttə, çətin olacaq. Digər komandaların heyətinə yeni cəlb olunan futbolçulara baxanda bunu hiss etmək mümkündür. Həm də komanda sayı artıb. Bunun özü də maraqlı məqamdır. İstənilən halda biz öz oyunumuza və nəticələrimizə baxacağıq ki, yekunda vəsiqəni qazanaq.
- Növbəti rəqibiniz 2 oyunda məğlub olmayan, debütant “İmişli”dir. Təhlükə gözlənilir?
- Təhlükəni bütün rəqiblərdən gözləmək lazımdır. “İmişli” də yaxşı komandadır. Çox qaçırlar, mübarizə aparırlar. Demək ki, qələbə qazanmaq üçün biz onlardan daha çox qaçmalı və mübarizə aparmalıyıq. Ağır oyun olacaq.
- “İmişli” “Sabah”ı məğlub edə bilər?
- Həyatda hər şey mümkündür.
HƏBİB
