Zəngəzur dəhlizi Mərkəzi Asiya, Xəzər regionu, Azərbaycan və Ermənistanı Türkiyə ilə birləşdirən sosial-iqtisadi, geosiyasi və geostrateji marşrut kimi seçilir. Türkiyə Orta Dəhlizin əsas komponenti olacaq bu xətt üzərində işə başlayıb.
Newscenter.az xəbər verir ki, bunları Türkiyənin nəqliyyat və infrastruktur naziri Abdulkadir Uraloğlu deyib. Onun sözlərinə görə, bu çərçivədə keçən həftə “Qars-İğdır-Aralık-Dilucu Dəmiryolu Xətti”nin təməl daşı qoyulub:
"İllik 5,5 milyon sərnişin və 15 milyon ton yük daşıma qabiliyyətinə malik bu xətt 224 kilometr uzunluğunda tikiləcək və Qarsla Naxçıvan arasında körpü rolunu oynayacaq".
Nazir qeyd edib ki, Zəngəzur dəhlizi və Orta Dəhlizi tamamlayan Qars-İğdır-Aralık-Dilucu Dəmir Yolu Layihəsi bu xəttin tutumunu və səmərəliliyini daha da artıracaq:
"Dəhlizin Türkiyə, Azərbaycan və Ermənistan arasında iqtisadi əməkdaşlığı gücləndirəcəyi, regional sülhü möhkəmləndirəcəyi, Cənubi Qafqazda iqtisadi əməkdaşlığı artırmaqla sərhədlərin açılmasını və diplomatik münasibətlərin normallaşmasını sürətləndirəcəyi gözlənilir".
Anar Əliyev
