ABŞ prezidenti Donald Tramp hazırda Ukraynaya qarşı müharibədə Moskvaya üstünlük verərək “Rusiya agenti” kimi davranır.
Tribunainfo.az “CNN Portugal”a istinadla xəbər verir ki, bu barədə Portuqaliya prezidenti Marselo Rebelo de Souza “Yay universiteti”ndə keçirilən gənclər tədbirində çıxışı zamanı bildirib.
Souza beynəlxalq vəziyyət və müasir çağırışlardan danışarkən Trampı emosional, vasitəçilərsiz birbaşa ünsiyyətə əsaslanan yeni siyasi liderlik üslubunun nümunəsi adlandırıb. Bununla belə, o, qlobal güclər balansında təhlükəli sürüşmənin baş verdiyini vurğulayıb.
“Xüsusi və mürəkkəb bir məqam var: aparıcı superdövlətin lideri, obyektiv olaraq, sovet və ya Rusiya agentidir. O, agent kimi davranır”, deyə Souza bildirib.
O, bunun “dostluq, iqtisadi, ideoloji və ya doktrinal əməkdaşlığa əsaslanan ittifaq” olmadığını qeyd edib.
“Mən deyirəm ki, obyektiv olaraq, yeni Amerika rəhbərliyi strateji baxımdan Rusiya Federasiyasına töhfə verir”, deyə o əlavə edib.
Souza vurğulayıb ki, yeni Amerika rəhbərliyi “bir tərəfin müttəfiqindən münaqişənin arbitrinə çevrilib” və bu arbitrin “yalnız Rusiya ilə danışıqlar aparmağa çalışdığını, Ukrayna və Avropanı kənarda saxladığını” söyləyib.
UNIAN-ın məlumatına görə, ABŞ prezidenti Donald Tramp Ukraynada müharibənin mümkün qədər tez başa çatmasını istəyir və bunun necə olmasının onun üçün fərqi yoxdur.
“The Atlantic”in yazdığına görə, ABŞ administrasiyasındakı yüksək vəzifəli rəsmidən alınan məlumata əsasən, Tramp son günlərdə Ukrayna müharibəsi ilə bağlı diplomatik səylərinin nəticə verməməsinə qəzəblənib. Onun narazılığını Respublikaçılar Partiyasındakı bəzi Rusiya əleyhdarları, o cümlədən senator Lindsi Qremin yenidən Rusiyaya qarşı sanksiyaların tətbiqinə çağırışı daha da gücləndirib.
ABŞ prezidentinin xüsusi elçisi Kit Kelloqun fikrincə, Rusiyanın Ukraynaya zərbələri Trampın can atdığı sülhə təhdid yaradır.
Almaniya kansleri Fridriz Merz isə Rusiyanın son hücumunu şərh edərkən bildirib ki, Tramp və Putin arasında əldə olunan razılaşmaya baxmayaraq, Putinlə Zelenskinin görüşü, çox güman ki, baş tutmayacaq.
