Avropa liderləri Ukrayna və Rusiya qoşunları arasında 40 kilometrlik bufer zonanın yaradılması imkanını nəzərdən keçirirlər. Ulusal.az xəbər verir ki, bu barədə Politico beş avropalı diplomata istinadən məlumat yayıb.
Məlumata görə, bufer zona müharibədən sonrakı tənzimləmə və ya atəşkəs üçün irəli sürülən bir neçə təklifdən biridir. Lakin zonanın dərinliyi barədə yekdil mövqe yoxdur. Həmçinin, Kiyevin bu təkliflə razılaşıb-raziılaşmayacağı da məlum deyil, çünki söhbət potensial ərazi güzəştlərindən gedir. ABŞ-ın hələlik bu müzakirələrdə iştirak etmədiyi bildirilir.
Politico yazır ki, NATO müttəfiqlərinin Ukrayna ərazisinin bir hissəsini bloklamaq ideyasını gündəmə gətirməsi, müharibənin nəticəsiz qalması fonunda onların ümidsizliyini göstərir. ABŞ Müdafiə Nazirliyinin keçmiş yüksək vəzifəli əməkdaşı Cim Taunsend isə qeyd edib: “Ruslar avropalılardan qorxmurlar. Əgər Avropa düşünürsə ki, bir neçə britaniyalı və fransız müşahidəçi Moskvanı dayandıracaq, yanılırlar.”
Avropa diplomatlarının sözlərinə görə, bu təşəbbüs Koreya müharibəsindən sonra yaradılan sərhəd zonasına bənzəmir, daha çox soyuq müharibə dövründə Almaniyanın bölünməsi ilə müqayisə edilir.
Bufer zonanın təhlükəsizliyi üçün göndəriləcək hərbi qüvvələrin sayı barədə isə rəqəmlər 4 mindən 60 minədək dəyişir. Hələlik heç bir ölkə rəsmi öhdəlik götürməyib. ABŞ prezidenti Donald Tramp da amerikalı hərbçilərin bu missiyaya cəlb olunmasını istisna edib.
NATO hazırda 300 minlik sürətli reaksiya qüvvəsi formalaşdırmaq üzərində işləyir. Avropa diplomatlarının fikrincə, mümkün sülhməramlı qüvvələr həm bufer zonada patrul xidməti aparacaq, həm də Ukrayna ordusuna təlimlər verəcək.
Fransa və Britaniya qoşunlarının beynəlxalq kontingentin əsasını təşkil edəcəyi ehtimal olunur. Bununla yanaşı, Polşa və Almaniya hərbçilərin Ukraynaya göndərilməsinə qarşı çıxır, çünki bu addımın onları Rusiya hücumlarına qarşı daha həssas edə biləcəyindən ehtiyat edirlər.
