"The Wall Street Journal" ABŞ administrasiyasının keçmiş və indiki əməkdaşlarının müsahibələrinə əsaslanaraq yazır ki, ABŞ Prezidenti Donald Tramp qərarlarının əksəriyyətini təkbaşına qəbul edir.
AFN.az xəbər verir ki, nəşr Trampın yaxın çevrəsində onu əhəmiyyətli şəkildə təsir edə biləcək insanların demək olar ki, olmadığını vurğulayıb.
Qəzet qeyd edir ki, Trampın ilk prezidentliyi dövründə məmurlar onun impulslarını cilovlayır və mühüm qərarlara təsir edirdilər. İndi isə az adam ona təsir göstərə bilir. Tarixçi Duqlas Brinklin Trampın bütün Amerika agentliklərinə nəzarət etmək istədiyini, hər qərarda “məsuliyyət mənə aiddir” mövqeyini tutduğunu vurğulayıb.
"The Wall Street Journal" Trampı fikrindən daşındırmaq cəhdlərinin uğursuz nümunələri olaraq Ağ Evdə bal zalının tikintisi, investorlar üçün kriptovalyuta şam yeməyi və Cənubi Afrika Prezidenti Ramaphosa ilə görüşdə videonun göstərilməməsi hallarını göstərib. Ağ Ev Aparatının rəhbəri Syuzan Uayls isə onun qərarlarına fəal müdaxilə etmədiyini bildirib.
