ain.az, Oxu.az saytına istinadən bildirir.
İngiltərənin "Liverpul" klubu UEFA Çempionlar Liqasının Liqa mərhələsində çox çətin və həyəcanlı oyunlara çıxacaq.
Monakoda keçirilən püşkatmadan sonra "qırmızılar"ın səkkiz rəqibi bəlli olub. Premyer Liqanın son çempionu evdə "Real Madrid", "Atletiko Madrid", "PSV Eindhoven" və "Qarabağ"ı qəbul edəcək. Komanda səfərdə isə "İnter", "Ayntraxt Frankfurt", "Marsel" və "Qalatasaray"la üz-üzə gələcək.
Baş məşqçi Arne Slot püşkü "çətin, amma həyəcanlı" adlandırıb:
"Keçən mövsümdə olduğu kimi, yenə də çətin püşkdür. Bunu bilirdik, çünki Çempionlar Liqasında, xüsusən də yeni formatda asan rəqib olmur. Ancaq aydındır ki, bu həm də çox maraqlı püşkdür, evdə və səfərdə böyük oyunlarla doludur.
"Real Madrid"i evdə yenidən qarşılamaq xüsusi hissdir. Keçən mövsümün oyunu yaddaqalan olmuşdu, bu dəfə də eyni olacaq. Düşünürəm ki, bu, bütün dünyanın izləyəcəyi qarşılaşmadır. "PSV Eindhoven" ilə görüş də mənim üçün fərqlidir, çünki onlar ardıcıl iki mövsüm Niderland çempionu olublar. "Qalatasaray" Türkiyədə son üç mövsümün, "Qarabağ" isə Azərbaycanın çempionudur.
"İnter", "Atletiko", "Ayntraxt" və "Marsel" kimi güclü komandalarla qarşılaşmaq isə Çempionlar Liqasının gücünü bir daha göstərir. Heç bir oyunumuz asan olmayacaq. Amma əminəm ki, azarkeşlərimiz ev matçlarını və böyük arenalarda keçiriləcək səfər görüşlərini səbirsizliklə gözləyirlər. Onlar həyəcanlıdırlar, biz də elə".
Slot həmçinin mövsümün sıx təqvimini vurğulayıb: "Önümüzdə həm ölkə daxilində, həm də Avropada çox sıx bir qrafik var. Amma biz buna hazırıq və qarşıdakı bütün çətinlikləri səbirsizliklə gözləyirik".
Ən son xəbərləri və yenilikləri almaq üçün ain.az saytını izləyin.
