Körfəz ölkələrini Cənubi Qafqaz üzərindən Qara Dənizlə birləşdirəcək yeni avtomobil marşrutu – Naxçıvan–Cəbrayıl–Füzuli–Ağdam–Yevlax istiqamətində formalaşdırılan nəqliyyat dəhlizi – region üçün strateji əhəmiyyət kəsb edəcək. Bu barədə Azərbaycan Baş nazirinin müavini Şahin Mustafayev avqustun 26-da Nazirlər Kabinetində Prezident İlham Əliyevin Vaşinqton səfərinə həsr olunmuş müşavirədə çıxışı zamanı bildirib.
“İqlim və relyefə görə bu marşrut ilboyu fasiləsiz fəaliyyət göstərəcək”, – Mustafayev bildirib.
Rəsmiyə görə, marşrut Körfəz ölkələri ilə Qara Dəniz limanları arasında yükdaşımaları üçün alternativ və daimi tranzit xətti kimi nəzərdə tutulur.
Bundan əlavə, Araz çayı üzərində inşa edilən Ağbənd–Kəlalə və Ordubad–Siyahrud avtomobil körpüləri Şərqi Zəngəzur ilə Naxçıvan arasında əlavə əlaqə yaradacaq. Rəsmilər bu layihələri region ölkələri arasında beynəlxalq yükdaşıma imkanlarını genişləndirəcək addım kimi qiymətləndirirlər.
Şahin Mustafayev həmçinin qeyd edib ki, 224 km uzunluğunda olan Türkiyə–Naxçıvan dəmir yolu xətti – Qars, Iğdır, Aralık və Dilucu istiqamətini əhatə edəcək yeni dəhliz – illik 15 milyon ton yük daşımaq gücünə malik olacaq.
Azərbaycanın Şərq-Qərb və Şimal-Cənub nəqliyyat dəhlizlərinin kəsişməsində yerləşməsi ölkəyə tranzit yüklərin idarə olunmasında mərkəzi mövqe qazandırır.
“Azərbaycan bu dəhliz vasitəsilə regionda sabitliyin və əməkdaşlığın təşviqçisidir”, – Mustafayev əlavə edib.
Rəsmilərin fikrincə, yeni kommunikasiyalar yalnız logistik imkanları deyil, həm də regionun enerji xəritəsini dəyişə, Azərbaycanın Avropa və beynəlxalq enerji bazarına çıxış rolunu daha da gücləndirə bilər.
Gülnar
