Hər kəsin adət etdiyi vərdiş insan sağlamlığına olduqca zərərlidir.
Far.Az xəbər verir ki, "Qazeta.ru" ilə söhbətində terapevt Mariya Tolstova bu barədə xüsusi xəbərdarlıq edib. Onun sözlərinə görə, "ayaq-ayaq üstə" oturmaq vərdişi zamanla sağlamlığa ciddi zərər vura və bir sıra xəstəliklərə səbəb ola bilər.
Mütəxəssisin sözlərinə görə, bu vərdiş onurğa sütununun çanaq sümüklərinə nisbətdə oxunun dəyişməsinə gətirib çıxarır ki, bu da bel əzələlərinə yükü artırır, bel ağrılarına, skoliozun güclənməsinə, fəqərəarası disklərin vəziyyətinin pisləşməsinə, fəqərəarası yırtıqların və protruziyanın yaranmasına və inkişafına səbəb ola bilər.
"Uzun müddət "ayaq-ayaq üstə" vəziyyətində oturmaq ayaqlarda venoz qan dövranını pozur, qan durğunluğu yaradır, aşağı ətrafların qan təchizatı zəifləyir. Bu, ödemlərə, keyiməyə və ayaqlarda ağrılara gətirib çıxarır. Nəticədə varikoz xəstəliyi və aşağı ətraf venalarının trombozu kimi xəstəliklər yarana bilər", – Tolstova əlavə edib.
Onun sözlərinə görə, həmçinin kiçik çanaq orqanlarının qan dövranı və qan təchizatı pozulur ki, bu da qadınlarda ginekoloji xəstəliklərin inkişafına və reproduktiv funksiyanın azalmasına səbəb ola bilər. Kişilərdə isə kiçik çanaq orqanlarının qan təchizatının pisləşməsi reproduktiv sahədə problemlərə gətirib çıxara və prostat xəstəliklərinin yaranma riskini xeyli artıra bilər.
"Tez-tez və uzun müddət "ayaq-ayaq üstə" oturmaq arterial təzyiqin yüksəlməsinə səbəb olur ki, bu da ürək-damar sisteminə yükü artırır və nəticədə ürək-damar xəstəliklərinin inkişafına şərait yaradır", – deyə terapevt vurğulayıb.
Bundan əlavə, diz və bud-çanaq oynaqlarına zədələyici yük bir neçə dəfə artır. Hətta bu vəziyyətdə uzun müddət qalmaq qan dövranının pozulması nəticəsində baldır sümüklərinin xarici tərəfindəki sinirə (malobərçək siniri) ziyan vura bilər. Bu isə ayaqlarda iynəbatma və keyimə hissinə, həmçinin pəncə ağrılarına və pəncə əzələlərində zəifliyə səbəb ola bilər.
Sağlamlığı qorumaq və bu problemlərdən yayınmaq üçün həkim iş və istirahət rejiminə əməl etməyi tövsiyə edir. Əyləşərək işləyənlər və uzun müddət masa və ya kompüter arxasında oturanlar hər 15–30 dəqiqədən bir qısa fasilə verməli və ayaq, bel, boyun əzələlərini gərən sadə hərəkətlər etməlidirlər. İş masasını rahat və səmərəli təşkil etmək, stolun, kreslonun hündürlüyünü tənzimləmək, kompüteri düzgün yerləşdirmək, iş səthinin və otağın işıqlandırmasını lazımi şəkildə təmin etmək vacibdir.
"Hər gün kiçik bir idman kompleksi etmək məsləhətdir: səhər gərilmə, axşam isə rahatlama hərəkətləri; gün ərzində daha çox hərəkət etmək, açıq havada gəzintilərə diqqət yetirmək; orqanizmdə ən kiçik nasazlıqlara vaxtında fikir vermək və mümkün xəstəliklərin qarşısını almaq üçün profilaktik məqsədlə mütəmadi olaraq həkim müayinəsindən keçmək lazımdır", – Tolstova əlavə edib.
