Hollivud ulduzu Silvestr Stallone, Florida ştatının Palm Biç bölgəsində yerləşən dəbdəbəli malikanəsini ilk dəfə ictimaiyyətə təqdim edib.
"Unikal" xəbər verir ki, dəyəri 35 milyon dollar olan və 2014-cü ildə inşa edilən malikanə "Veranda" jurnalının sentyabr-oktyabr buraxılışının əsas mövzusu olub.
Stallone və model həyat yoldaşı Cennifer Flavin bu ailə rezidensiyasını dörd il əvvəl alsalar da, yalnız iki il əvvəl köçüblər. İki mərtəbəli əsas binada 7 yataq otağı, 12 vanna otağı var. Sahəyə həmçinin iki qonaq evi daxildir.
Malikanə xüsusi çimərliyə açılır və açar formasında hovuzu var. Stallonenin qonşuları arasında musiqiçilər Con Bon Covi, Rod Stüart, radio aparıcısı Hovard Stern və mərhum Rush Limbaugh yer alır.
Daxili interyeri məşhur dizayner, Kardashian ailəsi ilə əməkdaşlığı ilə tanınan Martin Lourens Bullard hazırlayıb. Onun sözlərinə görə, evin üslubu “rahat dəbdəbə” və ailəvi isti atmosferi birləşdirir.
Stallone və Flavin daha əvvəl Kaliforniyanın Hidden Hills bölgəsindəki evlərini 17 milyon dollara, ondan əvvəl isə Beverli Parkdakı malikanələrini müğənni Adelə 58 milyon dollara satmışdılar.
