Çinin Təbii Sərvətlər Nazirliyi ölkənin ilk beş milli parkı üçün mülkiyyət hüquqlarının qeydiyyatını tamamladığını və bunun ekoloji mühafizənin inkişafında mühüm addım olduğunu elan edib.
Hafta.az-ın yazdığına görə, beş milli park, yəni Sanjiangyuan Milli Parkı, Nəhəng Panda Milli Parkı, Şimal-Şərqi Çin Pələngi və Bəbir Milli Parkı, Haynan Tropik Yağış Meşəsi Milli Parkı və Vuyişan Milli Parkı indi müxtəlif təbii sərvətlərə sahiblik hüququna malikdir.
Bu qeydiyyat hökumətin müxtəlif səviyyələri üçün səlahiyyət dairəsini müəyyən edir, təbii ehtiyatlara sahiblik, nəzarət və məsuliyyətləri aydınlaşdırır, milli parklarda mülkiyyət hüquqlarının idarə edilməsini gücləndirir.
Milli parklar unikal landşaftlar, müstəsna təbii irs və misilsiz biomüxtəliflik ilə seçilən Çinin təbii ekosistemlərinin ən mühüm hissələrini özündə birləşdirir.
Xatırladaq ki, 2021-ci ildə Çinin ilk milli parkları kimi yaradılan bu beş park 230 min kvadratkilometr qorunan ərazini əhatə edir və ölkənin əsas yerüstü vəhşi təbiət növlərinin təxminən 30 faizi özündə cəmləyir.
