Moldova Prezidenti Maya Sandu Rusiyanın separatçı Dnestryanı bölgəsindəki hərbi varlığının dinc yollarla sona çata biləcəyini bildirib.
"Cebheinfo.az" xəbər verir ki, “Newsmaker” nəşrinə verdiyi müsahibədə Sandu belə deyib:
“Əsas sual, Rusiya ordusundan necə dinc yolla qurtula biləcəyimizdir. Əgər belə bir həll yolu tapılarsa, bəlkə də geosiyasi fürsət pəncərəsi açıla bilər”.
Əhalisinin təxminən 60 %-ni ruslar və ukraynalıların təşkil etdiyi Dnestryanı bölgə, Sovet İttifaqının dağılma dövründə Moldovadan ayrılmaq tələbi ilə gündəmə gəlmişdi.
Bu bölgənin sakinləri Moldovanın Rumıniya ilə birləşməsinə qarşı çıxaraq 1992-ci ildə baş verən qısamüddətli qarşıdurmalardan sonra faktiki müstəqil idarəetmə formalaşdırdılar.
Həmin vaxtdan bəri bölgədə təhlükəsizlik Rusiyanın rəhbərlik etdiyi sülhməramlı qüvvələr tərəfindən təmin olunur. Moldova, Ukrayna və Dnestryanını əhatə edən birgə hərbi nəzarət mexanizmi, yeni qarşıdurmaların qarşısını almaq məqsədi daşıyır.
Dnestryanı problemi Avropanın “dondurulmuş münaqişə” zonalarından biri kimi qalmaqdadır. Ukrayna müharibəsindən sonra isə bölgədə gərginlik yenidən gündəmə gəlib.
Moldova Rusiyanın bölgədəki hərbi varlığını beynəlxalq hüquqa zidd hesab edir və Qərb ölkələri də bu mövqeyi dəstəkləyir.
Lakin Krımın ilhaqı və Ukraynadakı müharibə səbəbilə Şərqi Avropada artan gərginlik, Dnestryanıda mövcud status-kvonun asanlıqla dəyişməyəcəyini göstərir.
Moldova, rus əsgərlərinin bölgədən çəkilməsi üçün diplomatik strategiya üzərində işləyir. Lakin Moskvanın mövqeyi və bölgədəki etnik balans, sülh yolu ilə həllin qarşısındakı əsas maneələr kimi qalır.
