Türkiyənin Aydın vilayətinin Kuşadası rayonunda övlad sahibi ola bilməyən uşaq həkimi yeni doğmuş körpəni pul qarşılığında anasından alaraq evinə aparıb.
Publika.az Türkiyə mətbuatına istinadla xəbər verir ki, hadisə Kuşadası Dövlət Xəstəxanasında baş verib.
Məlumata görə, sözügedən həkim 9 günlük körpəni evdə qucağından düşürdükdən sonra müalicə üçün onu başqasının övladı kimi xəstəxanaya qaytarmağa çalışıb. Lakin tibb bacılarından biri körpənin üz və baş nahiyəsində əzik əlamətləri görüb və məsələni xəstəxana rəhbərliyinə çatdırıb. Hadisə prokurorluğa bildirilib və cinayət işi başlanıb.
Şebnem E. adlı həkim prokurorluqda əməlini etiraf edib. Vəzifəsindən uzaqlaşdırılan həkim barəsində “insan alveri” və “ehtiyatsızlıqdan xəsarət yetirmə” maddələri ilə cinayət işi açılıb.
