Olaylar.az xəbər verir ki, dövlət başçısı bildirib ki, Ukraynanın müdafiə strategiyası yalnız müdafiə ilə məhdudlaşmır, eyni zamanda, düşmənə ciddi şəkildə cavab verməyi də əhatə edir.
Zelenskinin sözlərinə görə, Rusiyanın raket və pilotsuz təyyarələrlə həyata keçirdiyi hücumlar hərbi obyektləri deyil, dinc şəhərləri, mülki infrastruktur obyektlərini hədəf alır. Bu isə, onun fikrincə, beynəlxalq hüququn və müharibə qanunlarının kobud şəkildə pozulmasıdır:
"Belə zərbələrə heç bir halda tam sükutla cavab vermək olmaz. Ukraynanın uzaqmənzilli dronları bu cavabı verir. Rusiya hərbi müəssisələri, logistikası, hava limanları başa düşməlidir ki, bu müharibə onlar üçün real nəticələr doğurur", - deyə o bəyan edib.
Ukrayna lideri həmçinin ölkəsinin öz müdafiə imkanlarını genişləndirdiyini və daha təsirli şəkildə düşmən hədəflərini məhv etdiyini qeyd edib. Onun sözlərinə görə, Ukrayna hərbi sənayesində ciddi irəliləyişlər baş verib və bu, Rusiya ərazisində yerləşən strateji obyektlərin vurulmasında özünü göstərir.
Zelenski beynəlxalq ictimaiyyətə də müraciət edərək, Rusiyanın bu cür hücumlarına qarşı daha sərt mövqe sərgiləməyə çağırıb. O, Ukraynaya müasir hava hücumundan müdafiə sistemlərinin, uzaqmənzilli raketlərin və zərbə dronlarının verilməsinin vacibliyini vurğulayıb.
Sonda Zelenski Ukrayna xalqına səbr və dözüm arzulayıb, ölkəsinin azadlıq və suverenlik uğrunda mübarizəsinin sona qədər davam edəcəyini bildirib.
