Son dövrlərdə internetdə sürətlə yayılan süni intellekt məzmunları, istifadəçilərin doğru məlumata çatmasını çətinləşdirir. Bu qarışıqlığın fərqində olan "DuckDuckGo" axtarış təcrübəsini daha təmiz və etibarlı etmək üçün diqqətçəkən bir addım atıb. Yeni funksiya sayəsində istifadəçilər, axtarış nəticələrində süni intellekt tərəfindən yaradılmış şəkillərin görünməsini istəmədiklərini seçə biləcəklər.
Valyuta.az xəbər verir ki, brauzer üzərindən aparılan şəkil axtarışlarında artıq “AI images” (Süni intellekt təsvirləri) başlığı altında təqdim olunan bir menyu mövcuddur. Bu menyudan istifadə etməklə, süni intellektlə yaradılmış şəkillərin nəticələrdə yer alıb-almaması fərdi olaraq təyin edilə bilər. Filtrasiya sistemi, açıq mənbəli və könüllü icmalar tərəfindən hazırlanan siyahılara əsaslanır. Bu siyahılar “uBlockOrigin” kimi populyar reklam və məzmun bloklama vasitələrinin məlumat bazasını əsas götürür.
"DuckDuckGo" bildirir ki, bu filtrasiya mükəmməl deyil və internetdəki bütün süni intellekt əsəri şəkilləri tamamilə aradan qaldıra bilməz. Lakin yenə də bu vasitə ilə istifadəçilərin qarşılaşdığı saxta vizual məzmunun əhəmiyyətli dərəcədə azalacağı qeyd olunur. Şirkət, bu funksiyanın ilk addım olduğunu, gələcəkdə daha inkişaf etmiş süzgəclər üzərində çalışdıqlarını da elan edib.
Sistemin tanıdılması zamanı təqdim olunan nümunə axtarışı isə təsadüfi seçilməyib – “baby peacock” (tavusquşu balası) şəkilləri göstərilib. Təxminən bir il əvvəl istifadəçilər, xüsusilə bu cür axtarışlarda "Google"da görünən nəticələrin böyük hissəsinin süni intellektlə yaradıldığını müşahidə etməyə başlamışdılar. "Google" müxtəlif tədbirlər görsə də, bu tip saxta vizual məzmunların üstünlük təşkil etməsi hələ də ciddi problem olaraq qalır.
Nəticə etibarilə "DuckDuckGo" tərəfindən təqdim edilən bu sadə görünən filtrasiya vasitəsi, istifadəçilərin axtardıqları real şəkillərə daha rahat çatmasına kömək edə bilər və rəqəmsal mühitdə daha sağlam bir naviqasiya təcrübəsi təmin edə bilər.
Paşa Məmmədli
