Şuşada "Rəqəmsal keçidlər: süni intellekt dövründə informasiya və media dayanıqlılığının gücləndirilməsi" mövzusunda III Qlobal Media Forumunun üçüncü günü başlayıb.
Sitat.info xəbər verir ki, iyulun 19-da başlayan forum bu gün öz işini yekunlaşdıracaq.
Üçüncü günün proqramına aşağıdakı mövzularda panel müzakirələri daxildir: "İnformasiya təhlükəsizliyinin təminatı kimi media savadlılığı" və "Sosial şəbəkələrin təkamülü ictimai etimada necə təsir edir: KİV və media savadlılığının sərhədləri".
Xatırladaq ki, III Şuşa Qlobal Media Forumunda 52 ölkədən 140-a yaxın xarici qonaq, o cümlədən 30-dan çox informasiya agentliyinin, 7 beynəlxalq təşkilatın, 80-ə yaxın media strukturunun, eləcə də digər ixtisaslaşmış qurumların nümayəndələri iştirak edir.
***
İyulun 19-dan etibarən öz işinə başlayan və üç gün davam edən III Şuşa Qlobal Media Forumu başa çatıb.
Prezident İlham Əliyevin iştirakı ilə keçirilən Forum çərçivəsində bir sıra aktual panellər təşkil olunub.
