Son bir ildir ki, dolların bahalaşacağı ilə bağlı müzakirələr səngimir. Xüsusilə də, bu ilin payız aylarında manatın dəyər itirəcəyi istiqamətində fikirlər səsləndirilir. Bəzi iqtisadçılar məzənnə dəyişikliyinin gözlənildiyini qeyd edirlər.
Bu proqnozlar nə dərəcədə əsaslıdır? Payızda dolların bahalaşması real görünürmü?
News24.az bildirir ki, globalinfo.az-a danışan iqtisadçı Natiq Cəfərli bildirib ki, 2025-ci ildə məzənnə dəyişikliyi gözlənilmir:
“Hazırda manatın ucuzlaşmasına və dolların bahalaşmasına səbəb olacaq hər hansı iqtisadi əsas yoxdur. Ona görə də 2025-ci ildə belə bir qərarın verilməsi real görünmür. Lakin bu o demək deyil ki, gələcəkdə bahalaşma baş verməyəcək. 2026-cı ildə məzənnə dəyişikliyi ehtimalı daha yüksəkdir. Bizdə məzənnə də inzibati şəkildə tənzimləndiyi üçün dəyişiklik yalnız hökumətin və Mərkəzi Bankın qərarı ilə mümkündür.
Yəni bu, bazarın diktəsi ilə deyil, inzibati qərarla baş verir. Bu səbəbdən düşünürəm ki, 2025-ci ildə məzənnənin dəyişdirilməsi çox aşağı ehtimallıdır. Amma 2026-cı il üçün belə bir qərarın gündəmə gəlməsi kifayət qədər real görünür”.