İndoneziyanın Bali adasının rəsmilərinin sözlərinə görə, bölgəyə gələn turistlərin keyfiyyətinin aşağı düşməsi səbəbindən cinayət nisbətləri artır.
Hafta.az-ın “The Guardian”a istinadən yazdığına görə, hesabatı pandemiyadan sonra Balidəki turist profilində əhəmiyyətli bir dəyişikliyi qeyd edir. Daha çox rəqəmsal köçərilərin və aşağı büdcəli turistlərin adaya səfər etdiyi bildirilir. Bəzi rəsmilərin fikrincə, bu, adanın infrastrukturunu çətinləşdirir və cinayət nisbətlərini artırır.
Ötən il Bali adasında 226 xarici turistin cinayətə cəlb edildiyi bildirilir. Bu rəqəm 2023-cü illə müqayisədə 16 faiz artım deməkdir. Bu cinayətlərə kibercinayətlər, narkotiklər, zorakılıq və torpaq saxtakarlığı daxildir.
Ötən ay Bali adasında bir villada avstraliyalı turistin güllələnməsi də xəbər manşetlərinə çevrilmişdi. İndoneziya polisi bildirib ki, Melburndan olan 32 yaşlı Zivan Radmanovic villaya gələn iki avstraliyalı tərəfindən öldürülüb və başqa bir avstraliyalı onlara kömək edib. Hadisədə əli olan 3 nəfər barəsində cinayət işi açılıb və günahkar bilinərsə, onları ölüm cəzası gözləyir.
Balidə yaşayan Qolkar Partiyasının siyasətçisi Aqunq Baqus Pratiksa Linggih şərh edir: "Baliyə gələn turistlərin keyfiyyəti aşağı düşür. Bunun əsas səbəblərindən biri aşağı büdcəli xarici turistlərin adada uzun müddət qalmasına imkan verən qeyri-qanuni qonaq evlərinin sayının sürətlə artmasıdır".
Bali hüquq müdafiəçisi Piter Panjaitan da deyir ki, sakinlər artan cinayət nisbətindən narahatdırlar. Mungqu kəndinin başçısı I Ketut Darta deyir ki, bu il kənddə 400 yeni villa tikilib, onların əksəriyyəti xaricilərə məxsusdur. O qeyd edir ki, tikinti kəndin əkinə yararlı torpaq sahələrini məhv edir.
İndoneziya Universitetinin kriminoloqu Adrianus Meliala xəbərdarlıq edir ki, vəziyyət daha da pisləşə bilər: “Demoqrafik vəziyyət dəyişir, adada daha çox əcnəbi uzun müddət məskunlaşır, bəziləri isə öz ölkələrindən cinayət şəbəkələrini gətirirlər”. Akademik, hüquq-mühafizə orqanlarının resursların çatışmazlığı səbəbindən Bali adasında baş verən hadisələrə reaksiya verməkdə çətinlik çəkdiyinə diqqət çəkərək, adanın cinayət təşkilatları üçün cəlbedici mərkəzə çevrilə biləcəyini qeyd edir.
