Sifarişlə Azərbaycana gətirilən avtomobillərin bəzilərinin kilometrajı alındığı ölkələrdə silinir.
NOCOMMENT.az xezerxeber.az-a istinadən xəbər verir ki, avtomobil ustası Vüsal Mehdiyev deyir ki, yürüşün çox olması avtomobilin çox istifadə edildiyinə və gələcəkdə texniki problemlərin ortaya çıxacağına işarə edir. Bu da avtomobilin satış qiymətini aşağı salır. Buna görə də avtomobili satışa çıxaran bəzi şəxslər yürüşü saxta yolla geri çəkməyə və maşının qiymətini qaldırmağa çalışırlar.
Ustanın sözlərinə görə, bu problemi öncədən bilmək və ortaya çıxarmaq çox çətin məsələdir. Yalnız avtomobil ölkəyə gətirildikdən sonra yaxşı mütəxəssis tərəfindən texniki baxışdan keçdikdən sonra bilmək mümkündür.
Qeyd edək ki, avtomobilin kilometrajını geri çəkən şəxslər istehlakçıları aldatma maddəsinə əsasən cinayət məsuliyyətinə cəlb oluna bilərlər. İstehlakçının aldadılması 40-500 manat arası olduqda həmin şəxs və yaxud şəxslərə 3 min manatdan 5 min manatdək cərimə və ictimai işlərə cəlb olunma, 500 manatdan artıq olduqda isə 5-7 min manatdək cərimə və ya 6 aylıq azadlıqdan məhrum etmə cəzası verilə bilər.
Xezerxeber.az mövzu ilə bağlı daha ətraflı videomaterialı təqdim edir.