İyulun 10-da səhər saatlarında Kiyevdə SBU polkovniki İvan Voroniç güllələnib.
Publika.az xəbər verir ki, bu barədə Ukrayna Ali Radasının keçmiş deputatı İqor Mosiyçuk məlumat verib. Yenilənmiş məlumata görə, mərhum SBU-nun “Alfa” kimi tanınan xüsusi təyinatlı dəstəsi olan Xüsusi Əməliyyatlar Mərkəzinin 16-cı şöbəsinin baş əməliyyatçısı vəzifəsini tutub.
Keçmiş deputatın sözlərinə görə, naməlum təcavüzkar Voroniçə yaxınlaşıb və tapançadan, ehtimal ki, səsboğucu ilə 5 atəş açıb. Polkovnik dərhal dünyasını dəyişib, cinayəti törədən şəxs isə hadisə yerindən qaçıb. Bu məlumatı Kiyev hüquq-mühafizə orqanlarının nümayəndələri də təsdiqləyirlər.
Hazırda hadisə yerində rayon və baş polis idarələrinin istintaq-əməliyyat qrupları, cinayət-axtarış əməkdaşları və kinoloji xidmət əməkdaşları çalışırlar.
