ABŞ Meksika sərhədində ciddi bir bioloji təhlükənin qarşısını almaq üçün qeyri-adi üsula əl atır: milyonlarla steril milçək yetişdirib onları havadan sərbəst buraxmaq. Bu qəribə səslənsə də, mal-qara üçün ölümcül olan bir zərərvericiyə qarşı effektiv üsul sayılır.
Yenisabah.az xəbər verir ki, söhbət “Yeni Dünya vint qurdları”ndan gedir. Bu milçəklər heyvanların, xüsusilə inəklərin, atların və ev heyvanlarının açıq yaralarına yumurta qoyurlar. Yumurtadan çıxan sürfələr canlı toxumanı yeyir və heyvanlarda dərin, ölümcül yaralara səbəb olur. Müalicə olunmasa, heyvan bir neçə gün və ya bir-iki həftə ərzində ölür.
Bu təhlükəli milçək 2023-cü ildən başlayaraq Panama, Kosta-Rika, Honduras, Qvatemala, Nikaraqua, Beliz və El Salvador kimi ölkələrə yayılıb. 2024-cü ilin noyabrında Meksikanın cənubuna çatması isə ABŞ-ı narahat edib. Buna görə də sərhəd bölgəsində heyvan ticarəti limanları bağlanıb. Dominos pizza
ABŞ bu vəziyyətə qarşı əvvəl də istifadə etdiyi üsulu yenidən tətbiq edir. Steril erkək milçəklər istehsal ediləcək və təyyarələrlə sərhəd bölgəsinə buraxılacaq. Onlar vəhşi dişi milçəklərlə cütləşəcək, amma bu cütləşmədən yumurta çıxmayacaq. Çünki dişi milçəklər yalnız bir dəfə cütləşirlər. Bu yolla populyasiyanın azalması hədəflənir.
Qeyd edək ki, bu metod 1960-1970-ci illərdə də uğurla istifadə olunmuşdu. Hazırda Panamada yerləşən yeganə müəssisə həftədə 100 milyon steril milçək istehsal edə bilir. Lakin vəziyyətə tam nəzarət üçün daha çox istehsala ehtiyac var.
ABŞ Kənd Təsərrüfatı Departamenti iyunun 18-də sərhəddə yeni bir milçək istehsalı zavodunun tikiləcəyini açıqlayıb. Zavod Mur Hərbi Hava Qüvvələri bazasında yerləşəcək. İlkin mərhələnin dəyəri 8,5 milyon dollar olacaq, amma layihənin ümumi xərci 300 milyon dolları keçə bilər.
Bundan başqa, Meksikadakı köhnə bir obyektin də 21 milyon dollara təmir edilərək 2025-ci ilin sonuna qədər istifadəyə verilməsi planlaşdırılır.
Aytac Əliyeva
Telegram kanalımız
