Azpolitika.az saytından alınan məlumata görə, ain.az bildirir.
ABŞ Prezidenti Donald Trampın administrasiyası Ukraynaya əlavə “Patriot” hava hücumundan müdafiə sistemi göndərmək imkanını nəzərdən keçirir. “The Wall Street Journal”ın məlumatına görə, məsələ hələ rəsmi qərar səviyyəsinə çatmasa da, bir neçə alternativ ssenari müzakirə olunur. Onlardan biri – sistemin birbaşa ABŞ tərəfindən deyil, Almaniya kimi müttəfiq ölkə vasitəsilə göndərilməsidir.
"AzPolitika” xəbər verir ki, bir gün əvvəl “Axios” nəşri də Vaşinqton və Berlin arasında bu istiqamətdə danışıqların aparıldığını təsdiqləmişdi.
Mənbələr bildirir ki, Tramp 4 iyulda Ukrayna Prezidenti Volodimir Zelenski ilə telefon danışığında “Patriot” sistemi üçün 10 ədəd raketin göndərilməsini təsdiqləyib. O, bu addımı Rusiyanın intensiv hava hücumları və sülh danışıqlarına maraq göstərməməsi ilə əsaslandırıb. Tramp, həmçinin digər mənbələrdən də silah təminatına yardım vəd edib.
Qeyd edək ki, Tramp əvvəllər dəfələrlə bəyan etmişdi ki, 2022-ci ildə prezident olsaydı, Rusiya Ukraynaya hücum etməzdi. Lakin son çıxışlarında onun Putinə qarşı daha sərt ritorikadan istifadə etdiyi müşahidə olunur.
Müstəqil mənbələrin hesablamalarına görə, Ukrayna indiyədək 7 “Patriot” sistemi alıb. Bunlardan 3-ü ABŞ tərəfindən (əsasən Bayden administrasiyası dövründə), digərləri isə Almaniya, Niderland və digər NATO ölkələri tərəfindən təqdim olunub.
CNN-in məlumatına görə, 1 iyulda ABŞ müdafiə naziri Pit Heqset Ağ Evlə razılaşaraq “Patriot” raketlərinin tədarükünü müvəqqəti dayandırıb. Bu qərar Pentaqon daxilində koordinasiya problemi kimi qiymətləndirilib. Trampın Zelenski ilə danışığı və yeni yardım vədləri isə bu qərarın əleyhinə yönəlmiş addım kimi görünür.
“Patriot” sistemləri ilə bağlı qərar, həm Trampın Rusiya ilə bağlı mövqeyində sərtləşməni, həm də ABŞ müdafiə strukturlarında fikir ayrılıqlarının artdığını nümayiş etdirir. Bu isə Trampın mümkün prezidentliyi dövründə xarici siyasət kursu ilə bağlı sualları artırır.
Rasim Əliyev “AzPolitika.info”
Hadisənin gedişatını izləmək üçün ain.az saytında ən son yeniliklərə baxın.
