Evinizi təmizləyərkən istifadə etdiyiniz tozsoranın arxasında nə qədər mürəkkəb texnologiya və uzun bir inkişaf yolu olduğunu heç düşünmüsünüzmü? Gündəlik həyatımızın ayrılmaz hissəsinə çevrilən bu cihazlar vaxtilə ağır, səsli və tez xarab olan mexanizmlər idi. Onlar həm istifadədə narahatlıq yaradır, həm də performans baxımından tez zəifləyirdi.
Xüsusilə toz torbalarının tez-tez dolması və filtr sistemlərinin tıxanması istifadəçilər üçün ciddi narahatlıq doğururdu. Məhz bu çatışmazlıqlar bir çox mühəndisin diqqətini cəlb etdi, lakin onların içərisində yalnız biri – Ceyms Dyson bu problemi kökündən həll etmək üçün illərlə inadla çalışdı. Onun məqsədi sadəcə daha yaxşı tozsoran yaratmaq deyildi; o, həm də mövcud texnologiyaya meydan oxumaq istəyirdi. 5000-dən çox prototip və illərlə davam edən təcrübə nəticəsində Dyson nəinki tozsoran texnologiyasını dəyişdirdi, həm də bütün bir sənayeyə yeni istiqamət verdi.
Valyuta.az xəbər verir ki, Britaniyanın qabaqcıl texnologiya şirkətlərindən biri olan “Dyson Limited” son bir neçə ildə tozsoran istehsalçısından çoxşaxəli texnologiya nəhənginə çevrilib. Şirkətin banisi Ceyms Dysonun 1991-ci ildə əsasını qoyduğu bu qurum bu gün 7 milyard funt sterlinqdən çox illik dövriyyəsi ilə dünya texnologiya sektorunda mühüm mövqe tutur.
Bir ideyadan doğan marka
Ceyms Dyson-un dizayn sahəsindəki təhsili və texnikaya olan marağı onu praktiki problemlərə texnoloji həll yolları axtarmağa vadar edirdi. Onun ilk kommersiya uğuru “Ballbarrow” adlanan bağ arabası ilə gəlsə də, bu məhsulun bazardakı davamlılığı ideyasının oğurlanması ilə nəticələndi. Bu uğursuzluq Dyson-u ruhdan salmadı, əksinə, onu daha böyük bir problemin – tozsoran torbalarının effektivliyinin zəifliyinin həllinə fokuslanmağa vadar etdi.
Dyson-un torbasız tozsoran ideyasını reallaşdırması asan olmadı. O, bu texnologiyanı inkişaf etdirmək üçün düz 5,127 prototip hazırladı və 15 il ərzində bu ideyaya heç bir şirkət maraq göstərmədi. Nəhayət, Yaponiyada onun “G-Force” adlı tozsoranı bazara təqdim olundu və yüksək qiymətinə baxmayaraq status simvoluna çevrildi.
Markanı yaratdı, bazar qarşıladı
1991-ci ildə “Dyson Appliances Limited” adı ilə öz şirkətini quran Ceyms Dyson 1993-cü ildə ilk torbasız “Dual Cyclone DC01” tozsoranını təqdim etdi. Bu məhsul bazarda fərqli dizaynı və texniki üstünlükləri ilə böyük maraq qazandı. “Torbaya əlvida deyin” sloqanı ilə başlanan marketinq kampaniyası ictimaiyyətin diqqətini cəlb etdi və satışların sürətlə artmasına səbəb oldu.
Şirkətin məhsul xətti təkcə tozsoranlarla məhdudlaşmadı. Dyson fərqli texnologiya sahələrinə də daxil olaraq aşağıdakı məhsulları inkişaf etdirdi:
Airblade əl qurudanlar – sürətli və gigiyenik qurulma texnologiyası
Air Multiplier ventilyatorlar – bıçaqsız, təhlükəsiz və modern dizayn
Ağıllı LED işıqlar – uzun ömürlü və enerjiyə qənaətcil sistemlər
Saç baxım cihazları – “Supersonic” fen, “Airwrap” və “Corrale” düzləndirici ilə fərqli yanaşma
Uğursuzluqlardan dərs alma fəlsəfəsi
“Dyson” şirkətinin bəzi layihələri, məsələn, “ContraRotator” adlı paltaryuyan və ya elektrik avtomobil istehsalı cəhdləri kommersiya baxımından uğursuz hesab olunsa da, bu təcrübələr şirkətin öyrənmə və təkmilləşmə prosesində mühüm rol oynadı. Bu yanaşma “Dyson”un dəyişən bazar tələblərinə adaptasiya olmasına və yeniliklərini daha da gücləndirməsinə şərait yaratdı.
Qlobal genişlənmə və sosial məsuliyyət
2000-ci illərdə istehsal proseslərini Malayziyaya və daha sonra Sinqapura köçürən “Dyson”, Asiyada mühüm AR-GE mərkəzləri qurdu. 2023-cü ildə Böyük Britaniyada süni intellekt sahəsinə fokuslanan texnologiya mərkəzini istifadəyə verdi. COVID-19 pandemiyası zamanı isə “Dyson” hökumətin sifarişi ilə 24 milyon dollarlıq tənəffüs cihazı hazırlayaraq sosial məsuliyyətini ortaya qoydu.
Təhsilə dəstək və innovasiyanın gələcəyi
Ceyms Dyson-un texnologiyaya olan bağlılığı onu təhsil sahəsində də təşəbbüslərə sövq etdi. 2017-ci ildə təsis etdiyi “Dyson Institute of Engineering and Technology” gənc mühəndislərin yetişdirilməsində önəmli rol oynayır. Eyni zamanda, “James Dyson Foundation” fondu vasitəsilə 145 milyon funtdan çox ianə ilə təhsil və səhiyyə sahəsinə töhfə verib.
“Dyson”un uğur düsturu
“Dyson”un davamlı uğur qazanmasının arxasında beş əsas prinsip dayanır:
Problemi müəyyən et və həll et – istifadəçilərin real ehtiyaclarından çıxış etmək
Əzmlə irəlilə – minlərlə uğursuzluq səni dayandırmasın
İnnovasiyaya investisiya et – illik gəlirin 15-20%-ni tədqiqat və inkişafa yönəlt
İdeyanı qorumağa önəm ver – patentlərlə texnologiyanı müdafiə et
Məhsuluna dəyər ver – premium məhsullarla kütləvi bazardan fərqlən
Bugünkü “Dyson” artıq sadəcə bir texnologiya şirkəti deyil, həm də mühəndislik və dizayn sahəsində bir brendə çevrilib. Bu uğur yolu sübut edir ki, davamlı inam, yaradıcı yanaşma və fədakarlıqla qurulan ideyalar dünyada əhəmiyyətli iz buraxa bilər.
Sərvanə Rəmixanova
