Smotriç həmçinin baş nazir Benyamin Netanyahunu HƏMAS-a qarşı müharibə zamanı ordunun hökumət göstərişlərinə tam əməl etməsini təmin edə bilməməkdə ittiham edib. O, gələcək addımlarını düşündüyünü, lakin koalisiyadan çıxmaqla hələlik hədələmədiyini bildirib.
Bu açıqlama Netanyahu ilə ABŞ prezidenti Donald Tramp arasında Vaşinqtonda keçiriləcək danışıqlardan bir gün əvvəl verilib. Görüşdə ABŞ-nin dəstəklədiyi 60 günlük atəşkəs təklifi müzakirə olunacaq.
Smotriç sosial şəbəkədə yazıb ki, "Nazirlər Kabineti və baş nazir yardımı, eyni zamanda HƏMAS-a da fayda gətirən bir marşrutla göndərməklə ciddi səhvə yol verib". Onun fikrincə, bu yardım nəticədə HƏMAS-a çatacaq və "müharibə şəraitində düşmənin logistik dəstəyinə" çevriləcək.
İsrail hökuməti hələlik Qəzzaya yardım siyasətində dəyişikliyi rəsmən elan etməyib. Lakin yerli media Nazirlər Kabinetinin şimal bölgəsinə əlavə yardımın çatdırılmasına səs verdiyini yazıb. Baş nazirin mətbuat xidməti və ordu məsələyə münasibət bildirməkdən imtina edib.
Qeyd edək ki, İsraildə Netanyahunun daimi atəşkəs razılaşmasına getməsi üçün artan təzyiqlərə baxmayaraq, sağçı koalisiyanın bəzi üzvləri buna qarşı çıxırlar. Yanvarda Smotriç bəyan etmişdi ki, müharibənin bütün məqsədləri yerinə yetirilmədən atəşkəsə razılıq verilərsə, partiyası koalisiyanı tərk edəcək.
