Rusiya hüquq-mühafizə orqanları milyarder və Çelyabinsk vilayət qanunvericilik məclisinin sədr müavini Konstantin Strukovu Çelyabinskdən şəxsi Bombardier biznes ceti ilə (50 milyon dollardan baha qiymətləndirilən) Türkiyəyə uçmağa çalışarkən saxlayıblar. “Kommersant”ın məlumatına görə, ölkənin ən iri qızıl hasilatı şirkəti olan “PAO Yujuralzoloto Qrup Şirkətləri”nin rəhbəri məhkəmənin ölkədən çıxış qadağasını pozub. Uçuş Rosaviatsiyanın tələbi ilə dayandırılıb, təyyarə əvvəllər həbs edilərək müsadirə olunmuşdu.
Təyyarənin göyərtəsində məhkəmə icraçıları biznesmenin artıq DİN tərəfindən ləğv olunmuş xarici pasportunu müsadirə ediblər. Çelyabinsk rayon məhkəməsinin qərarına əsasən, Strukov və onun ailə üzvlərinə qarşı Baş Prokurorluğun iddiası çərçivəsində ölkədən çıxış qadağan edilib.
Rusiya Baş Prokurorluğu Strukovun qızıl və kömür aktivlərini qanunsuz olaraq əldə etdiyini və onları nəzarətində olan şəxslərin və ailə üzvlərinin adına rəsmiləşdirdiyini hesab edir. Nəzarət orqanı onun 11 şirkətdəki səhmlərinin və paylarının, o cümlədən əsas aktiv — “Yujuralzoloto”nun dövlətin xeyrinə müsadirə olunmasını tələb edir.
