Bakıda yolların çökməsi ilə bağlı artan hallar ictimaiyyətdə narahatlıq doğurur. Bir müddət əvvəl gənc oğlanın asfaltın çökməsi nəticəsində kanalizasiya xəttinə düşməsi bu təhlükənin real olduğunu bir daha göstərdi. Ekspertlər xəbərdarlıq edirlər ki, paytaxtın alt infrastrukturu illərdir sistemsiz şəkildə formalaşdırılıb və ciddi problemlərlə üz-üzədir. Bu isə həm sürücülər, həm də piyadalar üçün birbaşa həyat təhlükəsi yaradır.
Bəs problemin səbəbi nədir, qarşısı necə alınmalıdır?
Globalinfo.az-a danışan nəqliyyat eksperti Elməddin Muradlı Bakıda yol infrastrukturunun dağılmasının əsas səbəbi kimi keyfiyyətsiz və sistemsiz tikinti işlərini göstərib.
Onun sözlərinə görə, zamanında görülməyən profilaktik tədbirlər, düzgün planlaşdırılmayan su-kanalizasiya xətləri və yeraltı axınların nəzarətsiz qalması nəticəsində yollar və səkilər çökür, insanlar üçün təhlükə yaranır:
“Əgər sistemlər vaxtında və düzgün qurulsaydı, bu qədər ağır nəticələrlə üzləşməzdik. Vaxtilə çox ciddi səhvlərə yol verilib. Bu gün isə yollar, hətta səkilər artıq təhlükə mənbəyinə çevrilib. Bakının altı sanki görünməyən bir “dənizdir”. Yağış, kanalizasiya, qrunt suları və yeraltı axınlar düzgün tənzimlənmədiyindən çökmə hallarına səbəb olur. İnsanlar artıq qorxur ki, yolda gedərkən asfalt çökəcək”.
Elməddin Muradlı
E.Muradlı bu vəziyyətin aradan qaldırılması üçün təcili şəkildə geoloji tədqiqatların aparılmasını və infrastrukturun təhlükəli sahələrinin müəyyənləşdirilərək yenidən qurulmasını zəruri sayır:
“Bu şəhərin altında nə baş verdiyini bilmədən, problemi həll etmək mümkün deyil. Əgər hardasa təhlükə varsa, onun qarşısı əvvəlcədən alınmalıdır. Əks halda, biz sadəcə fəsadların baş verməsini gözləyirik – bu isə düzgün yanaşma deyil”.
Ekspert vurğulayıb ki, xüsusilə son qar yağışlarından sonra yolların vəziyyəti daha da pisləşib:
“Qar və yağış yolları sıradan çıxarır. Artıq mən özüm də qorxu ilə küçədə hərəkət edirəm. Küçədə gedərkən yol hər an çökə bilər. Amma heç bir rəsmi qurum çıxıb vəziyyətlə bağlı açıqlama vermir. Demirlər ki, təhlükə var, ya da yoxdur. Bu məsələlərin üstündən susqunluqla keçilir.
Əslində bu, çox ciddi və köklü problem olduğu üçün onu qısa zamanda həll etmək də mümkün deyil. Milyardlarla vəsait tələb edən məsələlərdir və bu sahədə yeni qurumları da ittiham etmək düzgün olmaz. Amma risk getdikcə artır və insanlar real təhlükə ilə üz-üzədir”.
