Çin turistlərini Azərbaycana necə cəlb edək?
Türkiyədə qiymətlər bahalaşıb, Rusiya iqtisadi iflasdadır – bu vəziyyətdən necə bəhrələnək?
Tanınmış hüquqşünas Fərhad Mehdiyev turizmlə bağlı vacib bir məsələyə toxunub. O bildirir ki, xaricdən turist cəlb etmək sadəcə özəl sektorun təşəbbüsü ilə baş verə bilməz. Əgər dövlət müvafiq addımları atmasa, viza rejimi asanlaşdırılmasa, nəqliyyat əlaqələri qurulmasa, ölkənin tanıtımı düzgün şəkildə aparılmasa, heç bir biznes sektoru bu sahədə uğur qazana bilməz. Onun fikrincə, dövlət əvvəlcə əlverişli mühiti formalaşdırmalı, bundan sonra isə özəl sektor – yəni hotellər, restoranlar, turizm agentlikləri və digər xidmət sahələri üstünə düşən işi görməlidir.
Məhz bu baxımdan Prezident İlham Əliyevin son aylarda turizm məsələlərinə göstərdiyi diqqət və atdığı addımlar olduqca əhəmiyyətlidir. Davosda Çin dövlət televiziyasına verdiyi müsahibədə Prezident bildirib ki, artıq Çin vətəndaşları Azərbaycana gəlmək üçün heç elektron viza belə almırlar. Viza rejimi tamamilə ləğv olunub. Bu, təkcə texniki deyil, strateji qərardır. Prezidentin açıqlamasında da vurğulandığı kimi, bu addım həm turistlərin sayını artırmaq, həm xalqlar arasında təmasları gücləndirmək, həm də ictimai diplomatiya vasitəsilə Azərbaycanın tanınmasını təmin etmək məqsədi daşıyır. Bu, Azərbaycanın turizm siyasətində yeni mərhələnin başlandığını göstərir.
Hazırda isə bölgədə yaranan iqtisadi və siyasi vəziyyət ölkəmiz üçün xüsusi fürsət yaradır. Türkiyədə qiymətlər kəskin bahalaşıb. Bu ölkə əvvəllər çinli turistlər üçün münasib bir səfər istiqaməti idisə, indi artıq kifayət qədər bahalı və kütləvi turizm səbəbindən cazibəsini itirən məkana çevrilib. Rusiya isə həm təhlükəsizlik, həm də iqtisadi sabitsizlik səbəbindən çinli turistlərin prioritetindən çıxır. Avropaya səyahət isə həm bahalı, həm uzaq, həm də vizalar baxımından daha mürəkkəbdir. Beləliklə, Çinli turistin qarşısında münasib qiymətli, sabit, təhlükəsiz və mədəniyyət baxımından zəngin bir yeni istiqamət axtarışı yaranır. Bu istiqamət Azərbaycanın ola biləcəyini düşünmək üçün kifayət qədər əsas var.
Azərbaycan coğrafi baxımdan Çinə nisbətən daha yaxın və nisbətən daha az tanınan bir ölkədir. Bu isə çinli turist üçün həm maraqlı, həm də orijinal bir təcrübə vəd edir. Qədim tarix, fərqli memarlıq, yerli adət-ənənələr, zəngin mətbəx, rəngarəng təbiət – bütün bunlar ölkəmizin təqdim edə biləcəyi dəyərlərdir. Qobustan qaya təsvirləri, İçərişəhər, Lahıc, Xınalıq kimi unikal mədəni-tarixi məkanlar düzgün şəkildə təqdim olunarsa, Çin bazarından turist cəlb etmək real hədəfə çevrilə bilər.
Üstəlik, Çinli turistlər mədəniyyət və ənənəyə xüsusi maraq göstərən qonaq növüdür. Onlar üçün yerli əl işləri, kənd həyatının təqdimatı, folklor nümunələri, məbədlər, bazar mədəniyyəti və ənənəvi mətbəx böyük maraq doğurur. Bütün bunları düzgün şəkildə paket halında təqdim etmək, çin dilində təlim keçmiş bələdçilər hazırlamaq, birbaşa uçuşlar və turizm agentlikləri ilə əməkdaşlıq yaratmaq Azərbaycanın bu bazarda uğurlu mövqe tutmasına yardım edə bilər.
