Finss.az - ABŞ Prezidenti Donald Tramp bəyan edib ki, 1 avqustdan etibarən ölkə bir sıra ticarət tərəfdaşlarına qarşı yüksək idxal rüsumları tətbiq edəcək.
Trampın sözlərinə görə, bəzi mallara 60-70%, digərlərinə isə 10-20% aralığında rüsumlar müəyyən ediləcək.
ABŞ administrasiyası artıq bu cümə günündən tərəfdaş ölkələrə yeni rüsum dərəcələri barədə bildirişlərin göndərilməsinə başlayacaq. Tramp rüsumların tətbiqinin 9 iyula qədər tam razılaşdırılacağını bildirib.
Prezident daha əvvəl maksimum rüsum həddini 50% olaraq elan etsə də, yeni açıqlamalar bu həddin daha da yüksəldiyini göstərir.
Yüksək rüsumlar tətbiq ediləcəyi ilk dəfə bu ilin aprelində açıqlanmışdı, lakin danışıqlar aparmaq üçün bu tədbir 90 gün təxirə salınmışdı. Bu müddət ərzində ABŞ yalnız Vyetnamla razılaşma imzalaya bilib, Çin və Böyük Britaniya ilə isə yalnız ilkin çərçivə sazişləri əldə olunub.
ABŞ hazırda Avropa İttifaqı, Yaponiya, Hindistan və Cənubi Koreya ilə danışıqları davam etdirir. Lakin Tramp Yaponiya ilə irəliləyişin zəif olduğunu vurğulayaraq, bu ölkənin 30-35%-lik rüsum ödəyə biləcəyini istisna etməyib. ABŞ maliyyə naziri Skott Bessentin sözlərinə görə, Hindistanla razılaşma yaxın görünür, lakin Yaponiya və Koreya ilə müzakirələr son həftələrdə demək olar ki, dayanıb.
