İyulun 1-dən Rusiyada biometrik məlumatlarını təqdim etməyən əcnəbilərin mobil telefon xətləri sıradan çıxmağa başlayıb. Fəal olmayan xətlər birbaşa kəsilərkən, aktiv istifadə olunan xətlər bir aylıq keçid müddətindən sonra mərhələli şəkildə bağlanacaq. Rusiya Rəqəmsal İnkişaf Nazirliyindən verilən məlumata görə, 2 milyondan çox əcnəbi fərdi biometrik sistemə qeydiyyatdan keçərək yeni qaydalara əsasən müqavilə imzalayıb. Lakin bu, ölkədə yaşayan bütün əcnəbilərə şamil edilmir.
Hafta.az-ın yazdığına görə, SİM karta sahib olmaq üçün əcnəbilərin üz şəklini və səs nümunəsini təqdim etmələri məcburi hala gəldi. Bu proses yalnız səlahiyyətli bank ofislərində şəxsən həyata keçirilə bilər.
“Business FM”in məlumatına görə, aktiv xətt istifadəçisi hələ də biometrik məlumatlarını təqdim etməyibsə, ilkin olaraq beynəlxalq və şəhərlərarası zənglər bloklanır, sonra internet sürəti azalır, 30 gündən sonra isə xətt tamamilə bağlanır. Bu müddət ərzində istifadəçi SNILS əldə edərək “Elektron Hökumət” sisteminə daxil olmaqla bankda biometrik qeydiyyatını tamamlamalıdır. Beləliklə, rəqəmsal profil yaradılır və yeni bir xətt əldə etmək və ya onların mövcud xəttini yeniləmək mümkün olur.
TMT Consulting-in baş direktoru Konstantin Ankilov bildirib ki, bu qayda ölkədə daimi və ya müvəqqəti olan bütün əcnəbiləri əhatə edir və yüz minlərlə insanın əlaqəsi kəsiləcək. Ankilov hesab edir ki, mövsümi miqrantların əksəriyyəti eyni xətti saxlamağa çalışmayacaq, yeni xətt almaq üçün əvvəldən prosedurdan keçəcəklər. Nazirlik iddia edir ki, tənzimləmə “boz kartlar” və fırıldaqçılıq hallarına qarşı effektivdir. Rusiya vətəndaşları da SİM kart alarkən şəxsiyyətlərini təsdiqləməlidirlər, lakin biometrik tələb yalnız əcnəbilərə şamil edilir.
