Ajans.az aljazeera -a istinadən xəbər verir ki, “Xüsusilə atəşkəslə bağlı təşəbbüslərin davam etdiyi bir dövrdə bu məsuliyyətsiz ilhaq çağırışları beynəlxalq ictimaiyyətin uzun illərdir dəstəklədiyi həll prinsiplərini heçə sayır,” – deyə Türkiyə Xarici İşlər Nazirliyi bildirib. Bu açıqlama, İsrail Baş naziri Benyamin Netanyahunun Likud partiyasından olan 14 nazirin işğal olunmuş İordan çayının Qərb sahilinin dərhal ilhaq edilməsinə çağırmasından sonra verilib. Maliyyə naziri, sağçı Bezalel Smotrich tərəfindən sosial şəbəkə “X” platformasında paylaşılan və Netanyahunun ünvanına yazılmış məktubda, imza atan nazirlər hökumətdən “Knessetin (parlamentin) yay sessiyası başa çatmadan əvvəl Yəhudiya və Samariyada (Qərb sahili) suverenliyi tətbiq etməyi” tələb ediblər. Yay sessiyasının iyulun 27-də başa çatması gözlənilir. İsrail 1967-ci il müharibəsi zamanı Fələstin ərazilərini işğal edib, lakin Qərb sahilini rəsmi şəkildə ilhaq etməyib – bu, sağçı nazirlərin uzun müddətdir arzuladığı məqsəddir. Lakin 7 oktyabr 2023-cü ildə Həmasın hücumu və ardınca Qəzzada başlanan müharibədən sonra İsrail hakimiyyəti Fələstin ərazilərinin sərhədlərini yenidən cızmağa başlayıb.
