BAKI, 27 iyun. TELEQRAF.
ABŞ-nin 2026-cı maliyyə ili üçün (oktyabrın 1-də başlayacaq) 1,01 trilyon dollar həcmində müdafiə büdcəsi layihəsi ilk növbədə Çinin qarşısını almaq və Amerika hərbi-sənaye kompleksini aktivləşdirmək məqsədi daşıyır.
Teleqraf xəbər verir ki, bu barədə jurnalistlərə Pentaqon nümayəndələri məlumat veriblər.
Departamentin əməkdaşlarından birinin qeyd etdiyi kimi, “bu müdafiə büdcəsində prioritetlər daxili təhlükəsizlik, Çinin Hind-Sakit okean regionunda təcavüzünün qarşısını almaq və müdafiə-sənaye bazasının canlandırılmasıdır”. Departament Konqresdən ABŞ quru qüvvələrinin ehtiyacları üçün 197,4 milyard dollar, Hərbi Dəniz Qüvvələri üçün 292,2 milyard dollar və Hərbi Hava Qüvvələri üçün 301,1 milyard dollar ayırmağı istəyir.
Pentaqon, xüsusən, milli nüvə triadasının bütün komponentlərinin modernləşdirilməsi üçün 60 milyard dollar, ABŞ-ın yerləşdirmək istədiyi “Qızıl Qübbə” raketdən müdafiə sisteminin yaradılmasına “ilkin sərmayə” kimi 25 milyard dollar, altıncı nəsil F-47 qırıcı-bombardmançı təyyarələrinin inkişafı üçün 3,5 milyard dollar, hipertonik silahların inkişafı üçün 3,5 milyard dollar almağı gözləyir. Bundan əlavə, hərbi idarə kibertəhlükəsizliyin təmin edilməsi üçün 15,1 milyard dollar, hərbi sənaye kompleksinin ehtiyacları üçün təchizat zəncirinin yaxşılaşdırılması üçün 1,3 milyard dollar, raket və digər döyüş sursatlarının istehsalının artırılması üçün 2,5 milyard dollar, sərhəd nəzarətinin gücləndirilməsi üçün 5 milyard dollar tələb edir.
