BAKI, TurkicWorld
İranın müdafiə naziri general Aziz Nasirzadə, Şanxay Əməkdaşlıq Təşkilatının (ŞƏT) müdafiə nazirləri səviyyəsində keçirilən toplantısında iştirak etmək və bir sıra ikitərəfli görüşlər keçirmək məqsədilə Çinin Tsindao şəhərinə səfər edib.
TurkicWorld xəbər verir ki, sammitə Çin müdafiə naziri Donq Cun ev sahibliyi edir və regionun aparıcı ölkələrinin müdafiə rəhbərlərini bir araya gətirir.
Donq Cun sammitin kənarında bir sıra ölkələrin – İran, Belarus, Pakistan, Qırğızıstan və Rusiya müdafiə nazirləri ilə görüşlər keçirib. General Nasirzadə də bu görüşlərdə iştirak edib.
Toplantının əsas məqsədi regionda təhlükəsizlik məsələlərinin müzakirəsi, terrorizmlə mübarizə və üzv dövlətlər arasında hərbi əməkdaşlığın dərinləşdirilməsidir.
Nazir Nasirzadənin səfəri İsrailin İran əleyhinə hərbi əməliyyatlara son qoyaraq birtərəfli atəşkəs elan etməsindən bir gün sonraya təsadüf edir ki, bu da səfərə xüsusi geosiyasi məna verir.
İran müdafiə nazirinin Çin rəhbərliyi ilə yüksək səviyyəli görüşlər keçirəcəyi və Tehran-Pekin arasında hərbi əməkdaşlığın daha da genişləndirilməsi istiqamətində müzakirələrin aparılacağı gözlənilir. Görüşlərdə həmçinin regional və beynəlxalq məsələlər də gündəmdə olacaq.
