RUSİYA UKRAYNAYA HÜCUM EDİB » AzadMedia.az

Zelenski Haaqaya çatan kimi Rusiya Ukraynanı vurdu – Uşaqların da öldüyü hücumda 20-dən çox insan həyatını itirib

“Bu müharibədə tərəf seçmək çətin deyil. Ukraynanın yanında olmaq – həyatın yanında olmaq deməkdir”. Bunu, Ukrayna prezidenti Volodimir Zelenski Rusiyanın Dnipropetrovsk vilayətinə endirdiyi ağır raket zərbələrindən sonra bildirib.

Ukrayna rəsmilərinin məlumatına görə, iyunun 25-də günorta saatlarında baş verən hava hücumları nəticəsində azı 17 nəfər ölüb, 100-dən çox insan yaralanıb. Zərbələr məktəblərə, xəstəxanalara və sərnişin qatarına ciddi ziyan vurub. Qatarda ölən olmasa da, sərnişinlərin qan içində və qorxudan sarsılmış görüntüləri ictimaiyyətə təqdim olunub.

Bu arada, Sumı vilayətinə endirilən ayrıca hücumda azı üç nəfər, o cümlədən 5 yaşlı bir uşaq həlak olub. Vilayət rəhbəri Oleq Hrihorov deyib: “Onlar yatmışdılar. Rusiya pilotsuz təyyarələri onların yuxusunu – əbədi olaraq – yarımçıq qoydu.”

Bu arada, Dnipro şəhərinə yaxın Samar qəsəbəsində də iki nəfərin öldüyü bildirilib.

Raketlər atıldığı zaman Zelenski Haaqada NATO sammitində Avropa liderləri ilə görüşlərə yeni başlamışdı. Sammitin kuluarlarında onun ABŞ prezidenti Donald Trampla da görüşəcəyi və Rusiyaya qarşı yeni sanksiyaların, eləcə də müdafiə yardımlarının müzakirə olunacağı gözlənilir.

Ukrayna hakimiyyəti bu zərbələrin vaxtlamasını təsadüfi saymır. Rəsmi Kiyev hesab edir ki, Moskva bu cür hücumlarla sülh danışıqlarını pozmağa və müharibəni uzatmağa çalışır. Xatırladaq ki, ötən həftə Kanadada G7 sammiti ərəfəsində də Rusiya Kiyevi 9 saatlıq raket atəşinə tutmuş və ölkə üzrə 30-dan çox insanı öldürmüşdü.

Qeyd edək ki, ötən ay İstanbulda keçirilən birbaşa danışıqlarda tərəflər yalnız əsirlərin və həlak olmuş şəxslərin cəsədlərinin mübadiləsi barədə razılığa gəlmiş, digər məsələlərdə irəliləyiş əldə olunmamışdı. Hazırda yeni görüşlə bağlı plan açıqlanmayıb.