BAKI,TurkicWorld
Qırğızıstan Respublikasının Prezidenti Sadir Japarov iyunun 25-də rəsmi səfərlə Malayziyada olub və Putracaya şəhərində ölkənin Baş naziri Ənvər İbrahimlə danışıqlar aparıb.
TurkicWorld xəbər verir ki, görüş zamanı tərəflər Qırğızıstan ilə Malayziya arasında siyasi, iqtisadi, mədəni və humanitar sahələrdə əməkdaşlığın inkişaf etdirilməsi məsələlərini, həmçinin qarşılıqlı maraq doğuran digər istiqamətləri müzakirə ediblər.
Baş nazir Ənvər İbrahim ötən il Qırğızıstana etdiyi səfər zamanı göstərilən səmimi və qonaqpərvər münasibətə görə təşəkkürünü bildirib, ölkənin təbiətinin gözəlliyini və xalqının mədəniyyətini yüksək qiymətləndirib. O, hökumət üzvlərinə Qırğızıstana səfər etməyi və əməkdaşlıq imkanları ilə yerində tanış olmağı tövsiyə edib.
Sadir Japarov isə Baş nazirin sözlərini yüksək qiymətləndirərək bildirib ki, Ənvər İbrahimin Qırğızıstana səfəri iki ölkə arasında münasibətlərin möhkəmlənməsində mühüm rol oynayıb. O qeyd edib ki, son bir ildə Qırğızıstan–Malayziya əlaqələri fəal inkişaf edir və yeni əməkdaşlıq sahələri yaranır.
Japarov kənd təsərrüfatı məhsullarının, xüsusilə ət, bal və qoz kimi ekoloji təmiz məhsulların Malayziyaya ixracında əməkdaşlığa maraqlı olduqlarını vurğulayıb. O, həmçinin halal sənaye sahəsində əməkdaşlığın inkişaf etdiyini qeyd edib və bu sahədə Malayziyanın qabaqcıl təcrübəsinin öyrənilməsini vacib saydığını bildirib.
Sadir Japarov Qırğızıstanın Orta Asiyada hidroenergetika sahəsində öncül mövqeyə malik olduğunu bildirərək Malayziya tərəfini su elektrik stansiyaları və bərpa olunan enerji layihələrində iştirak etməyə çağırıb. O, həmçinin turizm sahəsində əməkdaşlığın genişləndirilməsini təklif edərək, Malayziya standartlarına uyğun kurort və mehmanxanaların inşasına dair təşəbbüsləri dəstəkləyəcəyini qeyd edib.
Baş nazir iki ölkə arasında təhsil, səhiyyə, informasiya texnologiyaları, yaşıl iqtisadiyyat və halal sənaye sahələrində əməkdaşlığın inkişafı üçün böyük potensial olduğunu bildirib. O, Malayziyanın bu təşəbbüsləri dəstəkləməyə və praktiki mexanizmlər işləyib hazırlamağa hazır olduğunu vurğulayıb.
Qeyd edək ki, bu səfər son 30 ildə Qırğızıstan Prezidentinin Malayziyaya ilk rəsmi səfəridir.
