BAKI, 19 iyun. TELEQRAF
Rusiyanın cinayət aləmində tanınmış şəxslərdən hesab edilən 60 yaşlı Gürcüstan əsilli kriminal avtoritet Şalva Çxenkelinin işi üzrə məhkəmə prosesi keçirilib.
Teleqraf-ın xəbərinə görə, Penza Vilayət Məhkəməsində hökm oxunub.
İstintaqa görə, Şalva Çxenkeli 1992-ci ildə cinayət aləmində “qanuni oğru” statusu alaraq, kriminal mühitdə böyük nüfuza malik şəxsə çevrilib. Onun əvvəllər qəsdən törədilmiş bir sıra cinayətlərə görə bir neçə dəfə məhkum olunduğu bildirilir.
2017-ci ildən etibarən o, adam oğurluğu, soyğunçuluq və ölümlə nəticələnən ağır bədən xəsarəti yetirmə kimi cinayətlərə görə cəza çəkib.
Məhkəmənin qənaətinə görə, Çxenkeli 2019-cu ilin aprelində statusunu yenidən təqdim etmədiyi halda belə, cinayət aləmində tutduğu mövqedən istifadəni davam etdirib. Eyni zamanda Penza vilayətindəki islah müəssisələrində kriminal qrupların fəaliyyətinə nəzarəti saxlayıb.
O, qeyri-qanuni olaraq "ümumi fond" üçün vəsait toplayıb, təsir dairələrini bölüşdürüb, məhkumlar arasında "etibarlı şəxslər" təyin edib, yaranmış münaqişələri həll edib. Onun hüquq-mühafizə orqanlarının tələblərinə tabe olmaqdan imtina etdiyi və qanuni səlahiyyətlərə məhəl qoymadığı da vurğulanıb.
Məhkəmə prosesində Şalva Çxenkeli özünü təqsirli bilməyib.
Hakimlər onun bundan qabaq etdiyi cinayətləri nəzərə alaraq hökm oxuyublar.
Hökmə əsasən, Şalva Çxenkeli 10 il müddətinə azadlıqdan məhrum edilib.
Qeyd edək ki, Şalva Çxenkeli Rusiya Federasiyası Cinayət Məcəlləsinin 210.1-ci maddəsi (kriminal iyerarxiyada yüksək mövqe tutma) ilə təqsirli bilinib.
