Həkim məsuliyyətsizliyi, səhv və ya gecikmiş diaqnoz səbəbindən ciddi xəsarətlərə məruz qalanlar ölkəmizdə kifayət qədərdir. Tibbi səhvlər nəticəsində insan həyatına və sağlamlığına zərər yetirilməsi, son illərdə artan bir problem olaraq diqqət çəkir. Bu cür səhvlərin təsiri ilə əmək qabiliyyətinin itirilməsi halları və hətta dünyasını dəyişən xəstələrin sayı günbəgün artır.
Ölkəmizdə, xüsusən, gənc yaşda insult keçirən xəstələrə yanlış diaqnoz qoyulması halları tez-tez baş verir. Məsələn, infarkt keçirən yaşlı bir xəstə təcili yardım otağından mədə pozğunluğu diaqnozu və sadəcə bir şüşə antasid ilə evə göndərilir. Bu cür səhvlər, xəstənin həyatını itirməsi və ya ciddi şəkildə zərər görməsi ilə nəticələnə bilər.
Belə tibbi səhvlər, yalnız xəstənin sağlamlığına deyil, həm də həkimlərin peşəkar məsuliyyətinə ciddi təsir edir. Həkimlərin düzgün diaqnoz qoyma və tibbi müdaxilə etmək vəzifələri qanunla tənzimlənir. Tibbi səhvlər nəticəsində xəstənin sağlamlığına zərər yetirildikdə, həkimlər yalnız peşəkar etika qaydalarına görə deyil, həm də hüquqi baxımdan məsuliyyətə cəlb edilə bilərlər.
Düzgün qoyulmayan diaqnoz və xəstəyə məsuliyyətsiz yanaşan həkimlərin hüquqi məsuliyyəti necə müəyyənləşdirilir və hansı cəzalarla üzləşə bilərlər?
Mövzu ilə bağlı hüquqşünas Ramil Süleymanov Bizim.Media- ya danışıb.
“Vətəndaşlar həkim səhvi ilə qarşılaşdıqları zaman dərhal hüquqi addımlar atmalıdırlar. Əgər tibbi səhv nəticəsində xəstənin sağlamlığına zərər yetirilirsə, bu halda Azərbaycan Respublikasının Baş Prokurorluğuna və ya ərazi üzrə şəhər və rayon prokurorlarına şikayət verərək məsuliyyətin araşdırılmasını tələb etmək mümkündür.
Həkimlərin səhv diaqnoz qoyması, yanlış müalicə tətbiq etməsi və ya hər hansı bir şəkildə öz peşə vəzifələrini məsuliyyətsiz yerinə yetirmələri, Azərbaycan Respublikası Cinayət Məcəlləsinin 314-cü maddəsi əsasında cinayət məsuliyyətinə cəlb edilə bilər. Bu maddəyə əsasən, həkimlərin səhv müalicəsi və ya qeyri-peşəkar yanaşması, vəzifəli şəxsin öz işinə səhlənkarlıqla yanaşması nəticəsində zərərçəkmiş şəxsə vurulmuş zərər kimi qiymətləndirilir”.
Cinayət varsa, cəzası da var..
“Cinayət Məcəlləsinin 314.1-ci maddəsinə uyğun olaraq, həkimlər bu cür səhvlərə görə 1500 manatdan 3000 manata qədər cərimə edilə bilər. Bundan əlavə, məsuliyyətsiz və qeyri-peşəkar yanaşmanın nəticəsi olaraq, həkimlər azadlığın məhdudlaşdırılması ilə 2 ilə qədər azadlıqdan məhrum edilmə və ya 6 aya qədər həbs cəzası ola bilər.
Əgər həkimin vəzifəsinə laqeyd yanaşması nəticəsində zərərçəkmiş şəxsə ağır dərəcəli xəsarətlər yetirilərsə, cinayət məsuliyyəti daha da ağırlaşır. Belə hallarda həkimlər 3 ildən 5 ilə qədər azadlıqdan məhrumetmə cəzası ilə cəzalandırıla bilərlər. Həkimlər üçün məsuliyyətli yanaşma təkcə etik deyil, həm də hüquqi bir tələbdir”,- deyə R.Süleymanov vurğulayıb.
Ayşən Rəhim, Bizim.Media
- Gecə Modu
- Ana səhifə
- Statistika
- Mənbələr
- Reytinq
- Hava
- Valyuta
