Analitik Ekspertiza Mərkəzinə "Mərcan” klinikasında cərrahi əməliyyat olunmuş və daha sonra vəfat etmiş Rusiya Federasiyası vətəndaşı Arzu Sadıqova ilə bağlı vətəndaş müraciəti daxil olub. Müraciət əsasında "Sahibkarlıq sahəsində aparılan yoxlamaların tənzimlənməsi haqqında” qanuna uyğun olaraq, müvafiq əsaslarla plandankənar yoxlama başlanıb.
Avtosfer.az-ın məlumatına görə, bu barədə “Teleqraf”a Səhiyyə Nazirliyinin Analitik Ekspertiza Mərkəzindən xəbər verilib.
Bildirilib ki, plandankənar yoxlama zamanı, hər hansı bir hüquq pozuntuları aşkar edilərsə bununla bağlı müvafiq hüquqi tədbirlərin görülməsi üçün materiallar aidiyyəti dövlət orqanlarına təqdim ediləcək.
"Analitik Ekspertiza Mərkəzi tərəfindən keçirilən araşdırmanın məqsədi cərrahi əməliyyatı həyata keçirən Nigar Məmmədovanın peşəkər tibbi fəaliyyəti və "Mərcan” klinikasının tibbi xidmət göstərmək üçün qanunvericiliklə tələb olunan lisenziya və icazələrə malik olub-olmamasını müəyyənləşdirməkdir.
Qeyd edək ki, Xüsusi Təftiş Komissiyasının qərarına əsasən, Nigar Məmmədovanın adı "Azərbaycan Respublikasının ərazisində plastik cərrahiyyə ixtisası üzrə praktik tibb fəaliyyətinə icazə verilən həkim-mütəxəssislərin siyahısı”nda yer almayıb.
Ölüm faktına gəldikdə isə, bu hal-hazırda hüquq-mühafizə orqanları tərəfindən araşdırılır.
Qeyd edək ki, icazəsiz tibbi fəaliyyətin həyata keçirilməsi "Özəl tibb fəaliyyəti haqqında” Azərbaycan Respublikasının Qanunu, eyni zamanda İnzibati Xətalar Məcəlləsinin müvafiq maddələrinə uyğun olaraq məsuliyyət yaradır".
Xatırladaq ki, Rusiya vətəndaşı olan Arzu Sadıqova "Mərcan" klinikasında ümumi cərrah eyni zamanda MedAura klinikasının baş həkimi Nigar Məmmədova tərəfindən icra olunan abdominoplastika və liposaksiya əməliyyatından sonra ölüb.
