Luçano Spallettinin İtaliya millisinin baş məşqçi postundan istefasından və Klaudio Ranyerinin bu vəzifəni qəbul etməkdən imtina etməsindən sonra İtaliya Futbol Federasiyası (FIGC) komandanın yeni çalışdırıcısı axtarışını intensivləşdirib.
Publika.az xəbər verir ki, namizədlər arasında ispan mütəxəssis Rafael Benitesin adı da çəkilir. O, Serie A-da çalışdığı dövrdə yerli azarkeşlərə yaxşı tanışdır.
İtaliya mediasının və “AS” nəşrinin məlumatına görə, FIGC Benitesin milli komandaya rəhbərlik etməyə hansı şərtlərlə razı olduğunu bilir və tərəflər danışıqlara açıqdır. Federasiya həmçinin Roberto Mançininin geri dönüşü, 2006-cı ilin dünya çempionu olan sabiq oyunçulardan Fabio Kannavaro və Cennaro Qattuzonun təyinatı kimi alternativləri də nəzərdən keçirir. Bununla belə, Benitesə olan maraq onun təcrübəsinə və nailiyyətlərinə yüksək qiymət verildiyini göstərir.
Benitesin namizədliyini cazibədar edən bir neçə əsas məqam var. O, artıq İtaliyada çalışıb, yerli futbolun xüsusiyyətlərini yaxşı bilir və italyanca sərbəst danışır. 2010-cu ildə “İnter”lə birlikdə İtaliya Superkubokunu və klublararası dünya çempionatını qazanıb. “Napoli”nin sükanı arxasında isə ölkə kuboku və superkubokuna sahib çıxıb.
