Amerikalı məşhur reper Eminemin nəşriyyat şirkəti Eight Mile Style texnologiya nəhəngi Meta Platforms-a qarşı nəhəng məhkəmə iddiası qaldırıb. Meta Facebook, Instagram və WhatsApp kimi sosial şəbəkələrin sahibi olaraq, Eminemə məxsus müəllif hüquqlarını sistemli şəkildə pozmaqda ittiham olunur və 109 milyon dollardan çox vəsaitin ödənilməsi tələb edilir.
Bu barədə Tribunainfo.az CBS News-ə istinadən məlumat verir.
İddia sənədlərinə görə, Meta Eminemin 243 mahnısını icazəsiz saxlamaq, ifa etmək və kommersiya məqsədilə istifadə etmək yolu ilə müəllif hüquqlarını pozub. İddiaçı xüsusilə Original Audio və Reels kimi funksiyaların istifadəçiləri reperin musiqisini lisenziyasız və müəllifliyi göstərmədən video məzmunlarında istifadə etməyə təşviq etdiyini vurğulayır.
Marshall Bruce Mathers III, yəni Eminem, 220 milyondan çox satılmış albomu ilə tarixdə ən uğurlu reperlərdən biridir. Onun yaradıcılığı 15 Grammy mükafatı ilə təltif olunub, “The Marshall Mathers LP” albomu ABŞ tarixində ən sürətli satılan albomlardan sayılır.
Eight Mile Style qanunsuz istifadə səbəbindən müəllif hüquqlarının dəyərinin azaldığı, itirilmiş gəlirlər və Meta-nın əldə etdiyi qazanc üçün təzminat tələb edir. Alternativ olaraq, hər bir 243 mahnı üçün Meta-nın hər üç platformasında qanunla müəyyən edilmiş maksimum 150,000 dollar kompensasiya tələb olunur ki, ümumi məbləğ 109,350,000 dollara çatır.
Bu Eminemin müəllif hüquqlarını müdafiə etdiyi ilk məhkəmə işi deyil. 2019-cu ildə Eight Mile Style Spotify-ə qarşı oxşar iddia qaldırmışdı və musiqi lisenziyalarının modernləşdirilməsi qanununu pozmaqda ittiham etmişdi.
İmran Kərimli
