Müasir cəmiyyətdə "bu gün sevgi yoxdur", "əvvəlki doğmalıq, səmimi insani münasibətlər çatışmır" kimi fikirlərə tez-tez rast gəlirik. Gənclər arasında sevgi-məhəbbət münasibətlərinin tez qırılması, iki insanın bir-birindən asanlıqla ayrılması, soyuması kimi hallara da tez-tez tast gəlirik. Münasibətlərin dayanıqlı, uzunömürlü olması üçün müasir gənclər nələrə diqqət etməlidir? Bu suallaQərbi Kaspi Unuversitetinin müəllimi, psixoloq Dilbər Bəhmənliyə müraciət etdik. Müəllim psixoloq Aznews.az müxbirinin suallarını cavablandırarkən dedi:
- Sağlam münasibətin əsasında sağlam ünsiyyət dayanır. Cütlüklər bir-birləri ilə sağlam ünsiyyət qurmağı bacarmalı və bir-birlərinə tələbatlarını açıq şəkildə ifadə etməlidirlər. Xəyanətlərin səbəbi adətən burdan qaynaqlanır. İkisi də qarşısındakından onun hiss və düşüncələrini anlamağı gözləyir. Lakin nəzərə almaq lazımdır ki, hər kəs qarşısındakı insanı anlayacaq qədər incə düşüncəli olmur. Heç belə bir məcburiyyət də yoxdur ki, qarşı tərəf falçılığa başlasın.
Dilbər Bəhmənlinin fikrincə, ünsiyyət sadəcə emosional hisslərin ifadəsi və ya konfliktlər üçün deyil, yaranmış problemin həlli üçün və cütlüklərin münasibətdən gözləntilərinin müzakirəsi üçün də istifadə olunmalıdır. "Əgər hər iki tərəfin gözləntiləri üst-üstə düşürsə, bu zaman sağlam münasibətdən söhbət gedə bilər. Sağlam münasibətin digər əlaməti isə balansın qorunmasıdır. Balanslı olmayan heç bir şey sağlam deyildir. Sevgi olsa belə. Əgər bir tərəf digər tərəfi hədsiz sevdiyini, itirməkdən qorxduğunu deyirsə, təəssüf ki, itirəcəkdir. Çünkü burda asılılıq var. Asılı olan münasibət isə sağlam deyil. Sağlam olmayan münasibət davam etsə belə, insana xoşbəxtlik gətirə bilməz. Hər birinizə özünüzü sağlam hiss edəcəyiniz bir münasibətdə olmağı arzulayıram".
