Bakı, 3 iyun, AZƏRTAC
İqtisadi Əməkdaşlıq və İnkişaf Təşkilatı (İƏİT) xəbərdarlıq edib ki, Yaxın Şərqdə uzanan münaqişə COVID-19 pandemiyası və 2009-cu il qlobal maliyyə böhranının təsirini çıxmaq şərti İlə, son dörd onillikdə ən ciddi qlobal iqtisadi yavaşlamaya səbəb ola bilər.
AZƏRTAC “Bloomberg” agentliyinə istinadla xəbər verir ki, Parisdə yerləşən təşkilatın son iqtisadi proqnozuna görə, qiymət təzyiqləri və zəifləmiş tələbat bir müddət davam edəcək və hətta Hörmüz boğazının potensial açılmasından sonra vəziyyət daha da pisləşə bilər.
İƏİT-in yeni iqtisadi proqnozuna görə, Yaxın Şərqdə davam edən gərginlik qlobal iqtisadiyyat üçün qeyri-müəyyənliyin əsas amilinə çevrilib. Təşkilat qeyd edir ki, enerji təchizatında fasilələr, neft və qaz qiymətlərinin artması və qlobal təchizat zəncirlərindəki pozuntular inflyasiya təzyiqlərini artırır və iqtisadi fəaliyyəti məhdudlaşdırır.
Təşkilatın baş iqtisadçısı Stefano Skarpetta qlobal iqtisadiyyatın yenidən ciddi təzyiq altında olduğunu və gələcək inkişafların əsasən münaqişənin müddətindən asılı olacağını bildirib.
Böhranın tədricən yumşalmasını və enerji təchizatının bərpasını nəzərdə tutan baza ssenarisinə görə, qlobal iqtisadiyyat 2026-cı ildə 2,8 faiz, 2027-ci ildə isə 3,1 faiz artacaq. Lakin fasilələr 2027-ci ilə qədər davam edərsə, qlobal artım 2026-cı ildə 2,1 faizə, 2027-ci ildə isə 1,8 faizə qədər yavaşlaya bilər. Bu, onilliklərin ən aşağı göstəricilərindən biri olacaq və bəzi ölkələri tənəzzülə sürükləyə bilər.
İƏİT, həmçinin inflyasiyanın sürətlənməsi, işsizliyin artması, süni intellekt layihələrinə investisiyaların azalması və maliyyə bazarlarında aktivlərin yenidən qiymətləndirilməsi riski barədə xəbərdarlıq edir.
Təşkilat vurğulayıb ki, dövlət borcunun yüksək səviyyəsi səbəbindən hökumətlərin iqtisadiyyatı dəstəkləmək imkanları məhdud olaraq qalır. Bununla belə, genişmiqyaslı istehlakçı dəstəyi tədbirləri məhdud təklif qarşısında enerji tələbatını daha da stimullaşdıra bilər.
