Britaniyanın müdafiə naziri Con Hilinin təyyarəsi Rusiya sərhədi yaxınlığında peyk siqnalını itirib.
Yeniavaz.com xəbər verir ki, bu barədə “The Times” qəzeti məlumat yayıb.
Nəşrin məlumatına görə, “Dassault Falcon 900LX” təyyarəsi Estoniyadan Böyük Britaniyaya qayıdarkən Rusiya sərhədi yaxınlığında radiomüdaxilə ilə qarşılaşıb.
Bütün uçuş boyu GPS naviqasiyası itib və siqnalı bərpa etmək üçün avadanlığı yenidən işə salmaq lazım gəlib. Lakin havada bunu etmək mümkün olmayıb.
Nəticədə, pilot uçuşun bütün üç saatı ərzində xarici siqnallara ehtiyac duymayan inertial naviqasiya sistemindən istifadə edib.
Nəşr təyyarənin cihaz panelinin qismən işləmədiyini və sərnişinlərin kompüterlərinin internetə qoşulmadığını qeyd edib.
“The Times” qəzetinin məlumatına görə, təyyarədə Hili ilə yanaşı hərbi və siyasi məsləhətçilər, bir general-leytenant, iki fotoqraf və bir jurnalist olub.
Nazir Estoniyaya Estoniyanın cənub-şərqində yerləşən Britaniya əsgərlərini ziyarət etmək üçün gedib.
Qəzet müdaxilənin məhz bu təyyarəyə qarşı yönəlmiş hücum nəticəsi baş verib-vermədiyi barədə məlumat verməyib.
Qeyd edək ki, aprelin 11-də “The Spectator” qəzeti nazir Hilinin Rusiya ilə bağlı açıqlamalarının London üçün ciddi risklər yaratdığını yazmışdı.
