NASA beynəlxalq və kommersiya tərəfdaşları ilə birlikdə Ay üzrə yeni missiyaya fəal şəkildə hazırlaşsa da, Mars planlarını da diqqətdən kənarda saxlamır. Agentlik 2028-ci ildə Qırmızı planetə uçuş müddətini azalda və onun araşdırılması üçün yeni imkanlar aça biləcək texnologiyanı sınaqdan keçirməyi planlaşdırır...
Poliqon xəbər verir ki, bu barədə The Hill yazıb.
Məlumata görə, NASA "Space Reactor-1 Freedom" adlı nüvə mühərrikli kosmik aparat hazırlayır. Aparat Marsa "Skyfall" adlı üç helikopter çatdırmaq üçün nəzərdə tutulub. Bu helikopterlər 2021-ci ildə "Perseverance" marsoxodu ilə birlikdə Marsa göndərilən "Ingenuity" aparatına bənzəyir.
Nəşr qeyd edir ki, "Space Reactor-1 Freedom" nüvə-elektrik mühərrik sistemi ilə işləyən raketdir. Sistem elektrik enerjisi vasitəsilə ksenon kimi yanacağı ionlaşdırır və bunun sayəsində yavaş, lakin sabit hərəkət qüvvəsi yaradır.
Jurnalistlər xatırladıblar ki, NASA əvvəllər günəş enerjisi ilə işləyən raketlərdən istifadə edib. Nüvə-elektrik mühərriklərinin əsas üstünlüyü isə onların uzaq kosmos missiyalarında daha effektiv olmasıdır. Çünki Günəş sisteminin daxili hissələrindən uzaqlaşdıqca günəş işığı zəifləyir.
"Space News" nəşrinin məlumatına görə, "Space Reactor-1 Freedom"un Marsa çatması və helikopterləri yerləşdirməsi üçün təxminən bir il lazım olacaq. Gələcəkdə isə daha güclü nüvə-elektrik raketlərinin Marsa iki-üç aya çata biləcəyi gözlənilir.
Alimlər hesab edirlər ki, nüvə və kimyəvi raketlər arasındakı uçuş vaxtı fərqi Yupiter və Saturn kimi xarici planetlərə missiyalar zamanı daha da böyük olacaq.
Tədqiqatçılar bildirirlər ki, belə raketlərdə olan ekipajlar planetlərarası uçuş zamanı mikrocazibə və radiasiya kimi təhlükələrə daha az məruz qalacaqlar.
Poliqon.info
