ABŞ-nin vitse-prezidenti Cey. Di. Vens Tulsi Qabbardın ABŞ Milli Kəşfiyyatının direktoru vəzifəsindən istefa verməsindən sonra 2028-ci il prezident seçkisində iştirakdan imtina etmək imkanını nəzərdən keçirir.
Bakıvaxtı.az-ın məlumatına görə, bu barədə "The Daily Mail" qəzeti mənbələrə istinadən xəbər verib.
Mənbələrin məlumatına görə, Qabbard ABŞ Prezidenti Donald Trampın "hərbi ambisiyalarını cilovlamaqda" Vensin bir neçə müttəfiqindən biri olub.
"Vitse-prezidentin "yumşaq xarici siyasəti" onu Trampla qarşıdurma vəziyyətinə salıb. Rubionun Vensdən daha çox nüfuzu var. Prezident ona qulaq asır. Vens ümumi mənzərəyə uyğun gəlmir və bu, artıq uzun müddətdir ki, belədir", - deyə qəzet Ağ Evdəki mənbənin sözlərini sitat gətirir.
Bildirilir ki, qarşıdan gələn seçkidə iştirakdan imtina etmək Vens üçün taktiki addım ola bilər və bu, ona "son bir neçə ildə baş verən hər şeyə görə məsuliyyəti öz üzərinə götürməmək" imkanı verəcək. Qəzet qeyd edir ki, 2032 və 2036-cı illərdəki seçkilərdə qalib gəlmək üçün Vensə təxminən on il ərzində siyasi çəkisini qoruyub saxlamaq lazım gələcək.
