Ağızda əriyən, şirəsini itirməyən və sobanı bulandırmadan hazırlanan möhtəşəm bir toyuq yeməyi. Xüsusi sousu sayəsində toyuq həm yumşaq qalacaq, həm də üzəri nar kimi qızaracaq.
Pravda.az bildirir ki, yanındakı tərəvəzlər isə toyuğun ləzzətli şirəsi ilə bişərək əla bir qarnirə çevriləcək.
Lazım olan inqrediyentlər
1 ədəd bütöv toyuq (və ya istəyə görə eyni çəkidə toyuq budları)
2 ədəd orta boy kartof
1 ədəd böyük boy kök
1 ədəd böyük boy soğan
1 xörək qaşığı un (soba torbasının içini unlamaq üçün)
Möhtəşəm sousu üçün:
1 xörək qaşığı pomidor tomatı
2 xörək qaşığı qatıq
2 xörək qaşığı zeytun yağı
1 diş əzilmiş sarımsaq
1 çay qaşığı kəklikotu
1 çay qaşığı şirin qırmızı toz bibər
1 çay qaşığı duz, istiot (zövqə görə)
Sousu hazırlayın: Dərin bir qabın içində qatıq, pomidor tomatı, zeytun yağı, əzilmiş sarımsaq, kəklikotu, qırmızı toz bibər, duz və istiotu yaxşıca qarışdırın.
Toyuğu souslayın: Yaxşıca yuyub qurutduğunuz bütöv toyuğun (və ya hissələrə bölünmüş toyuq ətinin) hər tərəfinə bu sousu sürtün. Sousun toyuğun dərisinin altına və içinə də dəyməsinə diqqət edin.
Tərəvəzləri doğrayın: Kartof, kök və soğanı iri halda doğrayın. İstəsəniz, qalan sousdan bir az bu tərəvəzlərin üzərinə də vura bilərsiniz.
Torbanı hazırlayın: 1 xörək qaşığı unu soba torbasının (bişirmə paketi) içərisinə töküb torbanı silkələyin ki, hər tərəfi unlansın. Artıq qalan unu torbadan boşaldın (bu, toyuğun torbaya yapışmasının qarşısını alır).
Torbanı doldurun: Souslanmış toyuğu və doğranmış tərəvəzləri soba torbasının içinə yerləşdirin. Torbanın ağzını paketdən çıxan xüsusi məftillə möhkəm bağlayın.
Hava dəlikləri açın: Torbanı soba listinə yerləşdirin. Üzərində buxarın çıxması üçün iynə və ya bıçağın ucu ilə 3-4 kiçik dəlik açın.
Bişirin: Əvvəlcədən 200°C dərəcədə qızdırılmış sobada təxminən 45-50 dəqiqə (toyuq tam qızarana qədər) bişirin.
Daha xırtıldayan dəri üçün: Toyuğun tam bişməsinə 10 dəqiqə qalmış soba torbasının üst hissəsini ehtiyatla (buxara diqqət edərək) kəsib aça bilərsiniz. Beləcə toyuğun üzəri daha da xırtıldayan olacaq.
Tərəvəz seçimi: Zövqünüzə görə torbanın içinə bütöv sarımsaq dişləri, göbələk və ya brokkoli də əlavə edə bilərsiniz.
Əminə Bayramova
