ABŞ-də dərc olunan yeni materiallarda ulduzabənzər naməlum obyektlər və qırıcıların təqibi ilə bağlı məlumatlar yer alıb...
ABŞ prezidenti Donald Trampin göstərişi ilə naməlum uçan obyektlərlə (UNO) bağlı yeni məxfi sənədlər ictimaiyyətə açıqlanıb.
Moderator.az xəbər verir ki, bu barədə ABŞ-ın "Newsweek" nəşri yazıb.
Yüzlərlə səhifəlik məxfi sənəd yayımlanıb
Nəşr yazır ki, söhbət ABŞ Milli Təhlükəsizlik Agentliyinin və Pentaqonun UNO müşahidələri ilə bağlı hesabatlarından gedir. Məlumata görə, UNO-ların araşdırılması ilə məşğul olan "The Disclosure Foundation" təşkilatı informasiya azadlığı qanunu çərçivəsində yüzlərlə səhifə sənəd əldə edib. Bundan əvvəl isə Tramp administrasiyası 160-dan çox oxşar faylı gizlilikdən çıxarıb.
13 qırıcı havaya qaldırılıb
Yeni sənədlərdə diqqət çəkən məqamlardan biri 13 qırıcı təyyarənin naməlum obyektin qarşısını almaq üçün havaya qaldırılması ilə bağlı məlumatdır. Şahid ifadələrindən birində ulduz formasında təsvir edilən obyektin "adi təyyarə ola bilməyəcəyi" qeyd olunur. Bildirilir ki, obyekt böyük yüksəklikdə sürətlə şaquli hərəkət edib, istiqamətini dəyişib və ağ parıltı yayıb. Obyektin eyni zamanda mavi çalara malik olduğu vurğulanır.
Digər hesabatlarda isə aşağı hündürlükdə səssiz hərəkət edən, iki sarı işığı olan obyektlərdən bəhs edilir. Sənədlərdən birində spiralvari şəkildə yayılan işıq saçan və mərkəzində qara nöqtə olan naməlum obyekt təsvir olunur. Başqa bir məxfi faylda isə Günəşdən daha parlaq görünən, Ayın təxminən yarısı ölçüsündə sferik və ya diskəbənzər UNO barədə məlumat yer alıb.
"Top Secret Umbra" qrifli materiallar
"The Disclosure Foundation" bildirib ki, sənədlərin bir hissəsi xüsusi məxfilik səviyyəsi sayılan "Top Secret Umbra" qrifinə malik olub. Bu status adətən ən həssas radioelektron kəşfiyyat məlumatlarına verilir. Təşkilatın baş hüquq müşaviri Hant Uillis bəyan edib ki, ABŞ Milli Təhlükəsizlik Agentliyi hələ də bir çox məlumatı gizli saxlamağa çalışır.
Onun sözlərinə görə, bəzi sənədlər hələ 1960-cı illərə aid olsa da, onların üzərində ciddi redaktələr qalır. Uillis bildirib ki, hüquq komandası bu məhdudiyyətlərin qanuniliyini məhkəmədə mübahisələndirməyə hazırlaşır.
Pentaqonun əvvəlki sənədlərində nə var idi?
May ayında ABŞ Müdafiə Nazirliyi də UNO və naməlum hava hadisələri ilə bağlı 160-dan çox sənəd yayımlayıb. Həmin materiallarda "Apollon" missiyalarına aid hesabatlar da yer alıb. Sənədlərdən birində "Apollo 11 Moon Landing" missiyasının ekipajının texniki hesabatı təqdim olunub.
Digər materiallarda isə astronavtların Aya uçuş zamanı müşahidə etdiyi izaholunmayan işıqlar və parıltılar barədə məlumatlar yer alıb. Arxivdə həmçinin 1957-ci ilə aid Federal Təhqiqatlar Bürosunun (FTB) hesabatı da mövcuddur. Həmin sənəddə şahid Vladyslaw Krasuski 1944-cü ildə Almaniyanın hərbi obyekti yaxınlığında böyük dairəvi uçuş aparatını gördüyünü bildirib.
Pentaqonun açıqladığı materiallar arasında İraqda çəkildiyi deyilən naməlum obyekt fotosu və 2023-cü ildə baş vermiş hadisə ilə bağlı FTB qrafik təsviri də yer alıb. Ağ Ev nümayəndəsi Anna Kelli bildirib ki, Tramp administrasiyası bu məsələdə maksimum şəffaflıq tərəfdarıdır. "Amerikalılar bu sənədlərin məzmunu barədə özləri nəticə çıxara bilərlər", - Ağ Evdən bildirilib.
