Güclü leysan yağışları səbəbindən Nyu-York və Nyu-Cersinin bəzi rayonlarını su basıb. Bu barədə Amerika mətbuatı, o cümlədən CBS News və The New York Post məlumat yayıb. Fırtınanın pik vaxtında Nyu-Yorkda 10 min nəfər elektrik enerjisiz qalıb, güclü su axınları səbəbindən yollar və metro xətləri bağlanıb.
CBS-in məlumatına görə, ən ciddi daşqın Bruklin və Kuins rayonlarında qeydə alınıb. CNN tərəfindən yayımlanan kadrlarda bəzi yollarda suyun səviyyəsinin avtomobillərin qapılarına qədər qalxdığı görünür. Səkilərdə suyun səviyyəsi piyadaların topuğuna çatıb.
Daşqın səbəbindən Kuinsdə Lonq-Aylend avtomagistralı Kross-Aylend-Parkvey ilə kəsişmədə hər iki istiqamətdə bağlanıb.
Fox News telekanalının məlumatına görə, Kuins rayonunda E və F metro xətlərində qatarların hərəkəti çətinləşib. E xəttində gecikmələr müşahidə olunur, F xəttində isə hərəkət qismən dayandırılıb. Bəzi metro stansiyalarından su çəkilir.
Fırtına zamanı küləyin sürəti saniyədə 26 metrə çatıb. Nəticədə Bruklinin Qreyvsend rayonundan Kuinsin Ozon-Park rayonuna qədər müxtəlif ərazilərdə ağaclar aşıb.
