Prezident Vladimir Putinin imzaladığı sərəncama əsasən, Rusiya Müdafiə Nazirliyi bu payız və qış aylarında 133 min gənci məcburi hərbi xidmətə çağırmağı planlaşdırır.
Musavat.com xəbər verir ki, yaz çağırışı zamanı hərbi xidmətə alınacaq 150 min nəfərlə birlikdə Rusiya ordusu 2024-cü ilin sonuna qədər ümumilikdə 283 min nəfəri orduya cəlb etmiş olacaq. Rusiya 2023-cü ilin payız çağırışı zamanı isə 130 min nəfəri hərbi xidmətə aparmışdı.
Putinin 2024-cü ilin sonuna qədər ordudakı aktiv hərbçi sayını 1,5 milyona çatdırmaq istədiyini açıqlamasından iki həftə sonra yeni sərəncam imzalanıb.
Məcburi hərbi xidmət 18-30 yaş arası bütün Rusiya vətəndaşı olan kişilərin əsas hərbi hazırlıq keçməsini tələb edir. Məcburi hərbi xidmətdən yayınan şəxslər iki ilə qədər həbs cəzası ala bilər.
Rusiya qanunlarına görə, hərbi xidmətə çağırılan şəxslər yalnız xidmətə götürüldükdən və əsas hazırlığı tamamladıqdan sonra dörd ay müddətinə döyüş bölgələrinə göndərilə bilər. Lakin Rusiyanın Ukraynaya genişmiqyaslı müdaxiləsindən sonra Putin ictimaiyyətə çağırışçıların döyüş əməliyyatlarında iştirak etməyəcəyi ilə bağlı təminat vermişdi. Ancaq bu təminat Rusiya qanunları ilə dəstəklənmir.
Rusiya ordusu yeni çağırılan əsgərlərin Ukraynaya göndərilməyəcəyini bir daha bəyan edib. Ordu həmçinin bildirib ki, bu çağırış dövründə Rusiyanın yeni rəqəmsal dövlət sistemi istifadə olunmayacaq. Hərbi xidmətə çağırılan şəxslər bunun əvəzinə 1 oktyabr – 31 dekabr tarixləri arasında çağırış məntəqələrinə şəxsən müraciət edəcəklər.
Musavat.com
