Ajans.az xarici mediaya istinadən xəbər verir ki, mayın 14-də altı yeniyetmə Toçiqi prefekturasında yaşayan 69 yaşlı qadının evinə basqın edib. Hücum zamanı yaşlı qadına 20-dən çox bıçaq zərbəsi endirilib. Onun 30 və 40 yaşlı oğulları isə ağır xəsarətlər alıblar. Cinayətkarlar evdən pul və qiymətli əşyalar oğurlayaraq hadisə yerindən qaçıblar. Polisin məlumatına əsasən, hücum edənlərdən biri hadisədən təxminən 30 dəqiqə sonra saxlanılıb və dindirmə zamanı Takemae cütlüyünün göstərişi ilə hərəkət etdiyini etiraf edib. Bildirilir ki, cütlük yeniyetmələrə bahalı avtomobil verərək onları qurbanların evinə göndərib. Kaito Takamae ölkəni tərk etməyə çalışarkən Tokio Beynəlxalq Hava Limanında həbs olunub. Miya Takemae isə yeddi aylıq qızı ilə birlikdə Kanaqava prefekturasındakı hoteldə saxlanılıb.
İstintaq hesab edir ki, dəstə uzun müddət qurban ailəsini izləyib. Hüquq-mühafizə orqanları Takemae qrupunun soyğunçuluq və oğurluq da daxil olmaqla digər cinayətlərdə də iştirak etdiyini ehtimal edir.
